Тываның Чазаа республиканың Күрүне тугунуң хүнүн бадылаар инициативаны деткээн

Регионнуң Баштыңы Владислав Ховалыгның адынга «Тываның буянныг чүректери» аныяктарның хөй-ниити шимчээшкининиң активинден Тыва Республиканың Күрүне тугунга тураскааткан албан езунуң байырлал хүнүн тургузар дугайында санал кирген. Майның 2-де ТР-ниң Баштыңының чанында күрүне демдектериниң айтырыгларының талазы-биле күрүне комиссиязының эксперттери база хөй-ниитиниң киржилгези-биле сайыттар кабинединге айтырыгны сайгарган соонда, республиканың Күрүне тугунуң хүнүн сентябрь 17-де доктаадыр дугайында хоойлу төлевилелин Дээди Хуралче киирер шиитпирни хүлээп алган.
«Бир эвес парламентарийлер "ийе" деп бадылаптар болза, бистиң календарывыска база бир ажылдаар байырлал хүнү бар апаар» - деп, Владислав Ховалыг шиитпирни бодунуң блогунда тайылбырлаан.
ТР-ниң Чазааның хуралында, Тываның сайыттар кабинединиң кежигүннери хоойлу төлевилелин чаңгыс үн-биле бадылаан. Тыва Республиканың күрүне демдектерин суртаалдап, өөреникчилерниң төөгүде билиглерин быжыглап, өзүп олурар салгалга патриотчу болгаш хамааты кижизидилгени, төрээн чуртунга чоргааралды болгаш ынакшылды хевирлээр дээн авторларның инициативазын Владислав Ховалыг, ооң оралакчылары база сайыттар деткээн.
Январьда республиканың хөй-ниити ажылдакчылары, эртем-шинчилел болгаш өөредилге албан черлериниң, ооң иштинде төөгү шинчилекчилериниң төлээлери киришкен хөй-ниити сайгарылга үезинде инициаторлар байырлал хүнүн февраль 8-те тургузарын саналдаан, ындыг болзажок республиканың Дээди Соведи Тываның кол ыдык демдээ – тугун 1992 чылдың сентябрь 17-де бадылаанын төөгү шинчилекчилери дыңнаткан. Ынчангаш ол хүннү хоойлу төлевилелинче киирер шиитпир хүлээп алдынган.
«Тыва Республиканың байырлал хүннериниң дугайында» Тыва Республиканың Хоойлузунуң 1-ги чүүлүнче өскертилгелер киирериниң дугайында» Тыва Республиканың хоойлу төлевилелин Дээди Хуралга сайгарып көөр кылдыр дамчыткан.