Тываның эпидемиологтары коронавирустуң "арктур" чаа хевири өөскүп болурун сагындырган

Республика Чазааның аппарат хуралында, Росхереглекчилер хайгааралының удуртукчузу Людмила Салчак май-июньда коронавирустуң чаа чалгыы - "омикроннуң" бир хевири XBB 1.16 "арктур" халдавыр өөскүп болурун дыңнаткан. Бүгү-делегейниң кадыкшыл организациязының дыңнатканы-биле алырга, апрельдиң эгезинде чаа вирус Индияга, Сингапурга база Австралияга кончуг дүрген тараан болза, ам 29 чурттар ону бүрүткээн. Россияның аңгы-аңгы регионнарында бөгүнде "арктур"-биле аараан дөрт таварылга бүрүткеттинген, а чаййгы дыштанылга эгезинде аарыг оон-даа нептереп болурун баш бурунгаар дыңнадып турар.
Ук вирус дыка халдавырлыг дээрзин эртемденнер айытканын, Людмила Салчак чугаалаан. Амгы үеде чоруп турар "кракенден" улуг-ла ылгал чок бол, дүрген тараачал деп, ол демдеглээн. "Арктурдан" аараан кижилерниң караа кызып, кижидип, конъюнктивиттей бээр деп, чурттуң медицина албаннары дыңнаткан. Оон аңгыда коронавирустуң ол хевиринден колдуунда-ла бичии уруглар аарыыр бооп турар.
Чаа халдавырдан камгаланырының дүрүмнери кижи бүрүзүнге билдингир - хууда арыг-силигни сагып, масканы кедер, дезинфекциялыг арыглаашкынны күштелдирер деп, Людмила Салчак сагындырган.
Эпидемиологтарның медээзинден алырга, эрткен неделяда Тывада коронавирус халдывырындан аарыын таварылга бүрүткеттинмээн. Ооң мурнунда неделяда чүгле чаңгыс аарыг кижи бары демдеглеттинген. Стационарлыг болгаш амбулаторлуг эмнээшкинде коронавирустан аараан кижи чок. Халдавырның тарап-нептерээниниң хуузу тик, орун фондузу 100 хуу хостуг. Эрткен неделяда ОРВИ-лээн болгаш грипптээн кижилер саны бичии көвүдээн, ылаңгыя бичии уруглар оон аарып турары демдеглеттинген.