Сибирь федералдыг округтуң маргылдаазынга тыва мөгелер хамыкты кайгаткан

Красноярск хоорайга эрткен хостуг хүрештиң округ маргылдаазынга  Тыва республиканың чыынды командазы дөрт алдын база алды мөңгүн медальдарны чаалап алган. Өске регионнардан специалистер тыва мөгелерниң  чедиишкинниг хүрешкенин демдеглеп, ооң чажыды чүдел дээрзин Тываның тренерлеринден сонуургаан.
Маргылдааның түңнел салыгларында тыва мөгелер шупту шаңналдыг черлерни ээлээн. Сибирьниң өске регионнарындан удурланыкчыларын ажып, түңнел оюннарда Тываның төлээлери чедиишкинниг хүрешкен. Эң-не чиик деңзиге Агым биле Кудер Монгуштар ужурашкаш, баштайгызы тиилээн. А 61 кил деңзиге Кежик Монгуш Кежик Седенни ашкан.
Кежик Чымба, Сайын Казырык, Арбак Сат, Баяр-Сайхан Бады, Комбу-Доржу Ооржак бирги база ийиги черлерни ээлеп, чараш хүрештерни көргүскен. Тыва мөгелерниң аадаңында алды хүлер медальдар база немешкен. Ынчап кээрге тыва мөгелер шупту шаңналдыг черлерни ээлээни ол.
Сибирь федералдыг округтуң чемпионадынга шаңналдыг үш черлерже үнген спортчулар сезоннуң кол старты - Россия чемпионадынга киржир путевканы чаалап алганнар. Бо чылын Россия чемпионады Дагестанда Каспийск хоорайга июньда болуп эртер.