РФ-тиң Президентизи Владимир Путин ЛУР-га ачы-дузазын көргүзүп чораан тыва эмчилерге Өөрүп четтириишкиннерни чарлаан

Россия Федерациязының Президентизи Владимир Путин 2022 чылдың чазынында Донбасска ажылдап чораан тыва эмчилерге Өөрүп четтириишкиннерни чарлаан. Тывадан эки турачы эмчилер бөлүү эрткен чылдың апрель эгезинде, тулчуушкун шөлдериниң чоогунда ажылдап турар коллегаларынга дузалажыры-биле, Луганск Улус Республикаже аъттанган турган. Командаже хирургтар, травматологтар база реаниматологтар кирген.
Ол тыва эмчилерниң Донбассче бирги сургакчылаашкыны болган. Тываның Баштыңы Владислав Ховалыг эки турачыларның аъттаныптарының бертинде ужурашкаш, четчелеттинип чыгдынганын боду хынап, менди чаагай орукту күзээн. Республиканың шыырак эмчилери ийи неделя ажыг үениң иштинде Луганскда боттарының коллегары-биле эгин кожа ажылдап, российжи армияның шериглерин база ЛУР-нуң хамаатыларын эмнеп, кезиишкиннерни чоруткан.
Эмчилер чанып тура боттарының бодалдары-биле үлешкен. Луганск Улус Республика – дыка чараш болгаш хүндүлээчел чер деп демдеглээннер. " Акы-дуңмалышкы Донбасска ачы-дузавыс көргүскенивис дээш өөрүп тур бис" – деп, делегацияны баштап чораан Күрүне Думазының депутады, травматолог-ортопед эмчи Айдын Сарыглар чугаалаан.
Эки турачыларның буянныг дузазын республикада бедии-биле үнелээн. Губернатор Владислав Ховалыг күш-ажылдың мурнакчыларын шаңнап тура, Тыва Республиканың Баштыңының Хүндүлел бижиин эрес-дидим эмчилерге тывыскан.
Россияның Прзединтизи В.В. Путинниң 2023 чылдың апрель 17-де №117-рп айтыышкыны езугаар, Россияның аңгы-аңгы адырларында өске-даа ажыл-ишчилер-биле кады, Тывадан эки турачы эмчилерге Россия Федерациязының Президентизиниң Өөрүп четтириишкин бижиктерин тывыскан.
Республиканың 1 дугаар эмнелгезиниң кол эмчизиниң организас-методиктиг ажыл талазы-биле оралакчызы, хирург эмчи Айдын Серен-оол, республиканың 2 дугаар эмнелгезиниң кезиишкин салбырының хирург эмчизи Алдын-Херел Монгуш, республиканың 1 дугаар эмнелгезиниң реанимация болгаш интенсивтиг терапия салбырының анестезиолог-реаниматолог эмчизи Дмитрий Ондар, арын-чаак кезиишкин салбырының стоматолог-хирург эмчизи Сылдыс Олчейбен, кезиишкин салбырының травматолог-ортопед эмчизи Маадыр Куулар база кезиишкин салбырының травматолог-ортопед эмчизи Дмитрий Кыргыс бедик шаңналга төлептиг болганнар.
Ол-ла айтыышкын-биле, республиканың перинаталдыг төвүнүң эмчизи Саян Сарыгларга, кадык камгалал адырында ачы-хавыяазы болгаш хөй чылдарда ак сеткилдиг ажылы дээш Россия Федерациязының Президентизиниң Хүндүлел бижиин тывыскан. Перинаталдыг төптүң кол эмчизиниң оралакчызы Айдын Монгуш Россия Федерациязының Президентизиниң Өөрүп четтириишкин бижиинге төлептиг болган.