Тывага бүгү-российжи субботникче 12 муң ажыг кижи үнген

Эрткен дыштаныр хүнде, Тывага Чер хүнүнге тураскааткан бүгү-российжи субботникче республиканың хоорай, суурларында хөй-ниити девискээрлериниң арыглаашкынынче 12300 ажыг кижи үнүп, 1600 кубометр бокту аштап-арыглаан. Ол хире бокту бок төгер черге чедиреринге 170 КамАЗ-ты ажыглаан. Ол ышкаш хоорай, суурлар аргылаашкынынче 124 санныг техника үнген.
Тываның Чазааның ажылдакчылары Калинин биле Лопсанчап кудумчуларының белдеринден Декабристер кудумчузунга чедир бокту аштааннар. Ооң мурнунда ийи каът, эргижирээн бажыңнар турган черниң орнундан 150 улуг шоодай ишти, азы 30 кубту бок-күзүрүмнү чыгган. Чүгле боктан өскеде, бажыңнарны бускан соонда артып каан тудуг боктарын бөлүп, чыгган.
Республиканың күүсекчи эрге-чагырга органнарындан – яамылар болгаш албаннар, ведомство албан черинден ниитизи-биле 58 коллективтен 600 ажыг кижи субботникке киржип, Востоктан аэропортка, Коммунал көвүрүгден Дөгээ дааның эдээнде орукта долганыр черге чедир арыглаашкынны чоруткан. Кыска үе дургузунда 176 куб бокту бөлүп, 860 шоодайга чыгган.
Тываның хоорай база суурлары май байырлалдарын ам арыг-силиг уткуур дээш, чаагайжыттынган. Тываның Баштыңы Владислав Ховалыг 2024 чылда чаагайжыдар объектилерни шилииринге республиканың чурттакчыларын кыйгырганын сагындыраал. za.gorodsreda.ru портал, муниципалитеттер сайтылары азы хөй кижилер чыглыр черлерде дежурныйлап турар волонтерлар дузазы-биле бадылаашкынга киржип болур. 14 хардан өрү назылыг чурттакчы чон аңаа киржир.
Бадылаашкынче 62 төлевилел кирген, ооң 30-ин шилиир ужурлуг. Чаагайжыдылга акша-хөреңгизин хуваарда, бадылаашкынның түңнелдерин көөр. Республика федералдыг субсидияны алыр дизе, Тываның чурттакчы чонундан 51,1 муңдан эвээш эвес кижи бадылаар ужурлуг.
2023 чылда Тывада 27 хөй-ниити девискээрлерин чаагайжыдар. Бо хүнде шупту ол объектилерге ниитизи-биле 30,3 млн рубльге керээлер чардынган.