Тыва бүгү-россижи субботникке каттыжар

Апрельдиң 22-де республиканың кожуун, хоорайларынга бүгү-российжи субботник болуп эртер. Боттарының бажың-балгаттары болгаш организацияларын арыглап-аштаарындан аңгыда, ““Чурттаар чер болгаш хоорай хүрээлеңи” национал төлевилелдиң “Таарымчалыг хоорай хүрээлеңин хевирлээри” программа-биле чаагайжыттынган хөй-ниити шөлдеринге субботниктээринге күзелдиг кижилер үлүүн киириштирип болур.
Хөй-ниити шөлдеринге кижилер субботниктеп турда, оларның бодалы-биле алырга 2024 чылда чаартыр ужурлуг девискээрлер дээш бадылаашкынга киржирин сүмелээр. Волонтерлар республиканың шупту кожууннарының чаагайжыдалгаже кииргени чаа төлевилелдериниң дугайында тодаргай чугаалап, канчаар бадылаарын тайылбырлаар.
Чаагайжыдар объектилер дээш онлайн-бадылаашкын май 31-ге чедир уламчылаар, 17.gorodsreda.ru федералдыг шөлчүгешке боттары база үнүн берип болур. Республиканың 14 хардан өрү назылыг чурттакчы кижи бүрүзү саналдаан шөлдерден чүгле чаңгыс девискээр дээш бодунуң үнүн берип, бадылаашкынга киржир.