Тываның найысылалында Вавилин ээтпээнче чырык киирер ажылдар уламчылавышаан

Бо чылын Кызылда Вавилин ээтпээнче чырыкты кииреринге 70 хире млн рубльди тускайлаан. Чазак бажыңынга болган бөгүнгү ужуражылга үезинде, «Россети Сибирь Тываэнерго» компанияның удуртукчузу Антон Лукин найысылалдың ол микрорайонунче энергетиктерниң планнааны хемчеглер бо чылын боттанырын республиканың баштыңы Владислав Ховалыгга чугаалаан. Губернатор регионга коммунал инфраструктураны эде чаартыр программаны күүседип эгелээриниң белеткел ажылдарын энергетиктер, тудугжулар болгаш экономистер-биле сайгарып көрген.
Антон Лукинниң медеглээни болза, чүгле Вавилин ээтпээнче чырык дамчыдар шугум тудуунче компания бо чылын 67 млн. рубльди салган, ону «Россети Сибирь Тываэнерго» инвестиция программазы-биле акшаландырар.
10/0,4 кВ күчүлүг 11 км чырык дамчыдар шугум база бирээзи-ле 630 кВа күчүлүг ийи трансформатор подстанциязын тургузары көрдүнген ажылдар «Солнечная поляна» СНТ девискээринде эгелээн. Ол участоктуң комплекстиг ажылдарынче чижеглей санаарга 30 млн рубль чарыгдаттынар. Чырык четкизинге бирги ээлчегде чиигелделиг хамаатыларның участоктарын кожар.
Чаа школаны чырык-биле хандырарынга ВЛ-10 кВ 12 км шугумну шөйүп, 1000 кВА күчүлүг ийи трансформатор подстанциязын база реклоузерни салыры планнаттынган.
2023 чылда «Вавилин ээтпээ» деп черге шупту 10/0,4 кВ-тыг 22,5 километр четкини тудуп, аңгы-аңгы номиналдыг, ниити 10/0,4 кВ күчүлүг 6 подстанцияны тургузар.
Бо чоокку үеде эгелээр тудуг ажылдары Вавилин ээтпээниң чурттакчыларын таарымча чок чүүлдерге таварыштырбазын энергетиктер аазаан. Хуу кижилерниң бажыңнарын кожуп турар үеде чырык бээрин кызыгаарлап болур, ындыг болзажок микрорайоннуң чурттакчыларынга чырыкты өжүрер деп турарын социал четкилерге баш бурунгаар дыңнадып дамчыдарын компанияның төлээлери чугаалаан.
Бажың ээлери чырык четкизинге шаптараазын чокка коштуруп алыр дээш, чогуур документилерин белеткеп, чер участоктарын дүрген кылдырып алырын чугаалашкан.