Тывада чаагайжыдар хөй-ниити шөлдерин шилиир бадылаашкын эгелээн

Тываның Баштыңы Владислав Ховалыг 2024 чылда чаагайжыдылга объектизин шилиир бадылаашкынга идепкейлиг киржиринче республиканың чурттакчыларын кыйгырган. Хөй чон чыглыр хөй-ниити черлеринге дежурныйлаан волонтерлар дузазы-биле муниципалитеттерниң сайтылары, za.gorodsreda.ru портал таварыштыр бадылаарын организастаар. 14 хардан улуг назылыг кижи бүрүзү киржир эргелиг.
Бадылаашкында кирген 62 төлевилелдиң 30-ин шилиир деп, республика Баштыңы чугаалаан. Бадылаашкынның түңнели-биле чаагайжыдылга акшазын үндүрер. Республика федералдыг субсидияны алыр дизе, Тываның 51,1 муңдан эвээш эвес чурттакчызы шилилдеге киржирин, Владислав Ховалыг сагындырган.
Ынчангаш харыысалгалыг ведомстволар болгаш муниципалитеттер удуртукчуларыынга даалгаларны берген. Тываның Баштыңы бадылаашкынны организастаар ажылды дүүштүрерин дааскан. Аныяктар херектериниң талазы-биле агентилел, муниципалдыг чагырга баштыңнары билдингир хөй-ниити черлеринге дежурныйлаар волонтерларны деткип, бадылашкынга киржир күзелдиг кижилерге дузалажыр.
2023 чылда Тывада 27 хөй-ниити девискээрлерин чаагайжыдары планнаттынган. Бөгүнде ол объектилер дээш ниитизи-биле 30,3 млн рубльге керээлер чардынган. Кызыл мэриязындан база Тожу кожуун чагыргазындан аңгыда, шупту тус чер чагырга черлери керээ түңүнүң 30 хуузу хемчээлдиг аванс төлевирин тудугжуларже шилчиткен.