Тываның Баштыңы агроүлетпүр болгаш бойдус камгалал комплекизиниң талазы-биле вице-премьерни томуйлаан

Бөгүн Тыва Республиканың Баштыңы Владислав Ховалыг Тыва Республиканың Чазак даргазының агроүлетпүр комплекизиниң талазы-биле оралакчызын томуйлаан. Таңды кожуун чагыргазының даргазы Алик Монгуш чаа вице-премьер алдан-дужаалда томуйлаткан.
«Алик Кертик-оолович Монгуш муниципалдыг албанда улуг албан-дуржулгалыг. Республиканың кол тараалаң чери – Таңды кожуунну сөөлгү алды чыл удурткан. Малчын өг-бүлеге өскен болгаш, ол көдээ ишке чоок. Кады ажылдап чорааш, ооң ажыл-агыйжы, идепкейжи, кижилерни эвилелдеп, чидиг айтырыгларны билип база шиитпирлеп шыдаарын көрдүм» - деп, Тываның Баштыңы Владислав Ховалыг демдеглээн.
Алик Кертик-оолович Монгуш 1980 чылда Сүт-Хөл кожууннуң Алдан-Маадыр суурга төрүттүнген. 2002 чылда Тываның күрүне университедин дооскан. 2009 чылда Сүт-Хөл кожуун чагырга даргазының корум-чурум профилактиказының дузалакчызы албан-дужаалддыг муниципалдыг албанга ажылдап эгелээн. Суму чагыргазының даргазынга, кожуун чагырга даргазының оралакчызынга ажылдаан. 2017 чылдан бээр - Таңды кожуун чагырга даргазы.
Республиканың Баштыңы чаа вице-премьерниң мурнунга: мал кыштаглаашкынын доозар, часкы-хову ажылдарынга белеткенир, арга-арыг өрттерин болдурбас кол даалгаларны берген. Алик Монгуш экологияны болгаш бойдус курлавырларын камгалаар айтырыгларны база удуртур.
Регион Чазааның даргазының оралакчызы албан-дужаалды ээлеп турган Уран-оол Алдын-оолович Ондар Тыва Республиканың Баштыңының чөвүлекчизи албан-дужаалче шилчээн.