Эрзин кожууннуң «Эзир-Уя» ансамбли "Культура" национал төлевилели-биле 2 млн рубльди алган

2023 чылда бот-тывынгыр коллективтерниң бүгү-российжи фестиваль конкурузунга Тывадан ийи коллектив киришкен. Жюриниң шиитпири-биле мөөрейниң ийиги чадазынче Сибирь болгаш Ыраккы чөөн чүктен 14 киржикчиниң санынче Тывадан улустуң уран чогаадыкчы ийи коллективи: Эрзинден «Эзир-Уя» аас чогаал бөлүү база Кызыл кожуундан «Аян тудаал» ыры ансамбли эрткен. Бурят Республикага төнчү оюн-көргүзүг болуп эрткен, Бурятияның Опера болгаш балет театрынга тиилекчилерни шаңнап-мактаан.
Төнчү көрүлдезиниң түңнелинде, «Аян тудаал» ансамбльдиң ыраажылары I чергениң дипломантылары, а «Эзир-Уя» аас чогаал бөлүү «Бот-тывынгыр чогаадыкчы коллективтерниң бүгү-российжи фестиваль-конкурузунуң лауреады» атты чаалап алган. Эрзинчилер хүндүлүг аттан аңгыда, «Культура» национал төлевилелдиң 2 млн рубль хемчээлдиг грантызы-биле шаңнаткан. Бүгү-российжи фестиваль-конкурска киришкен 278 коллективтерден грант деткимчезин “эң-не эң-не” деп шылгараан чүгле 20 коллектив алган.
Артистер акша-хөреңгизин коллективиниң материал-техниктиг хандырылгазынче: костюмнар, идиктер, хөгжүм херекселдеринче, ол ышкаш чаа концерт программазынче база гастрольдар организастаарынче чарып болур.
«Культура» национал төлевилелдиң «Нацияның чогаадыкчы курлавырын боттандырар байдалдарны тургузары» («Чогаадыкчы кижилер») федералдыг төлевилел чорудуу-биле чылдың-на эртип турар бот-тывынгыр чогаадыкчы коллективтерниң фестиваль-конкурузунга улустуң ыры, аас чогаал, танцы-сам коллективтери болгаш улустуң хөгжүм херекселдериниң оркестрлери киржип турар. Зонаның шилилде чадазының лауреаттары Москваның кол сцена шөлүнге Чоннуң чаңгыс эп-сеткилиниң хүнүнге тураскааткан гала-концерт кылдыр эртер көрүлдениң төнчү III чадазынга киржир чалалганы алыр.
Тываның төлээлери бот-тывынгыр чогаадыкчы коллективтерниң бүгү-российжи фестиваль-конкурузунга тиилеп, шак-ла ындыг грантыларны ап турганын сагындыраал. 2021 чылда Улуг-Хем кожууннуң Шагаан-Арыг хоорайдан ыры болгаш танцының «Улуг-Хем» улустуң ансамблиниң фольклор бөлүү лауреат атты чаалап алган. Артистер ийи миллион акшазы-биле чаа хөгжүм херекселдерин садып алган.