Федералдыг Чазак Тываның күрүне программаларын күүседиринге керээ чарар ажылынга бедик демдекти салган

Россия Федерациязының регионнарындан Тыва Республика күрүне программаларын боттандырар керээлер чарарынга эки үре-түңнелдерни көргүскен. РФ-тиң Чазааның даргазының оралакчызы Марат Хуснуллин регион хөгжүлдезиниң талазы-биле чазак комиссиязының (штабтың) президиум хуралында национал болгаш федералдыг төлевилелдер, инфраструктурлуг бюджет чээлилериниң акшалары база Национал чаагай чорук фондузунуң акша-хөреңгизи-биле боттаныышкында төлевилелдер чорудуун, коммунал инфраструктураны эде чаартыр регион программаларының төлевилелдерин сайгарып көргенин чугаалаан.
Россияның Президентизи эрткен чылдарда орук болгаш чуртталга тудуунда чедип алган темпини хевээр артырып, тус черниң транспорт, коммунал база социал инфраструктуразын шапкын темп-биле хөгжүдер даалганы бергенин, вице-премьер сагындырган.
«Планнаан шупту объектилерниң тудуун доозары күрүне программалары-биле үе шаанда керээни чарып алыры чугула дээрзин регион баштыңнарының кичээнгейинче углап тур мен» - деп, Хуснуллин чугаалаан.
Күрүне керээлерин чарарынга эки үре-түңнелдерни бөгүнде көргүскен регионнар аразынче Тыва, Бурятия, Мордовия, Нижегород, Пенза база Саратов областар болгаш Чечен республика киргенин, РФ-тиң Чазак даргазының оралакчызы дыңнаткан.
2023 чылда Тыва Республика Россияда ажылдап турар 49 күрүне программаларының 19-унда, 12 национал төлевилелде киржип турар.
Оон аңгыда штаб хуралында Москва, Тверь областарда база Татарстан Республикада коммунал инфраструктураны модернизастаар регион программаларының үш төлевилелин деткээн. Тыва Республиканың ындыг программазын январьда-ла федералдыг чазак деткээн болгаш, регион ооң күүселдезинче киргенин сагындыраал. Республика Баштыңы Владислав Ховалыг 2024 чылга чедир санаан программаның бирги чадазының хемчеглеринче федералдыг бюджеттен 616 млн рубль акшаландырыышкынны алырын дыңнаткан. Ол акша-хөреңги-биле 32 километр инженер четкилерин солуп, тудар.