Тывадан тускай шериг операциязының зоназынче сургакчылаан эмчилерге тускай төлевир чурумун доктааткан
13.04.2023
Донецск улус республика, Луганск улус республика, Запорожье база Херсон областарже ажылдап чоруткан Тывадан эмчилерниң болгаш эмчи сестраларының ажылынга төлевирни ийи дакпыр кылдыр төлээр. Бо неделяда республиканың Чазаа ындыг шиитпирни бадылаан. Президентиниң чарлыы болгаш айыттынган территорияларже сургакчылаашкынның онзагайының дугайында федералдыг чазактың доктаалынга даянгаш, ТР-ниң Кадык камгалал яамызы чогуур документини ажылдап кылган.
Эмчилерниң кол ажылында кадагалаттынган ийи дакпыр ортумак шалыңдан аңгыда, тускай шериг операциязының зоназынга турган үезинде өске чарыгдалдарны база эгидер – хөй-ниити транспортунга төлевир, чурттаар черни хөлезилээни, хүнде аштанып-чемненириниң акшазы дээш, өске-даа чарыгдалдар кирген. Сургакчылап турган үезинде бир хүнде чарыгдалдың түңүн 8480 рубль кылдыр тургускан.
Республиканың Кадык камгалал яамызы тускай шериг операциязының зоназынче эмчилерниң сургакчылашкынынга тускай төлевир 2022 чылдың декабрь 1 соонда ажылдарга хамааржырын доктаал быжыглаанын тайылбырлаан. Яамының дыңнатканы-биле алырга, бөгүнде чаа регионнарда 7 эмчи ажылдап турар болгаш, ол чурумче кирип турар. Ол дээрге, кезер эмчилер, ортопед-травматолог, анестезиолог-реаниматолог эмчилер, медбрат база кезер эмчи сестразы-дыр.
Тускай шериг операциязының баштайгы хүннеринде-ле тыва эмчилер эки тура-биле ол девискээрлерге ажылдап турганын сагындыраал. Ындыг эки турачыларның бирги бригадазы 2022 чылдың апрельде ынаар аъттанган турган. Оон аңгыда эмчилер республиканың чурттакчылары-биле кады чаа регионнарның чурттакчыларынга база тускай операция киржикчилеринге гуманитарлыг ачы-дуза чыылдаларында база ону чорударынга идепкейлиг киржип турарлар.
Возврат к списку
|