«Улуг-Хемниң хүнү»

Бо чылын регионнар аразының «Улуг-Хем хүнү» экологтуг байырлалын Тывага демдеглээр. Ооң кол хемчеглери сентябрь 28-те Кызылга Красноярск крайның болгаш Хакасияның төлээлериниң киржилгези-биле болуп эртер.Совет Тываның 5 чылы стадионнуң баарында шөлге чурттакчы чонну солун оюн-тоглаа программазы манап турар. Аңаа Красноярскиниң, Хакасияның, Тываның чогаадыкчы коллективтериниң концертинден аңгыда, күчүлүг Улуг-Хемге тураскааткан чуруктарны болгаш чоннуң ус-тывыжын делгээр. Шөл кухнязын база организастаар, күзелдиг чон балык мүнүн ижер аргалыг. Байырлалдың хүндүлүг аалчылары дээрге-ле, «Улуг-Хем — бичии чораан үемниң хеми» чогаадыгга, «Улуг-Хемге аян-чорук» чурулга мөөрейинге тиилээн өөреникчилер болур.

Ол-ла хүн журналистерге Улуг-Хем эриинге тайылбыр хемчеглери, а этнокультурлуг «Алдын-Булак» комплекизинге «Арыг суг бажы» темалыг «төгерик стол» болур. Аңаа тускай специалистерниң киржилгези-биле Улуг-Хемни кадагалап-камгалаарының айтырыгларын чугаалажыр. Байырлалды эрттирип турар кол сорулга —чурттакчы чоннуң кичээнгейин хемниң экологтуг байдалынче угландырары. Бо талазы-биле Улуг-Хемниң эриинде турар муниципалдыг тургузугларга экологтуг акцияларны эрттирер.

Тываның девискээринден эгелээн күчүлүг хемге тураскааткан байырлалды 2012 чылдан эгелеп Сибирьниң үстүнде адааным 3 регионнарында сентябрьның сөөлгү субботазында эртип турарын сагындыраал. Ук хемчегни «Орус географтыг ниитилелдиң» болгаш «Русгидро» компаниязы идип үндүрген болгаш ону 3 регионнуң удуртулгазы деткээн. Ол ышкаш Улуг-Хем байырлалын РФ-тиң Президентизи Владимир Путин база деткип, Россияда бир дугаар экологтуг байырлал өске регионнарга үлегер-чижек болур дээрзин демдеглээн.