Тываның чурттакчылары Улусчу фронту биле “Россияның демир-оруктары” акционерлиг ниитилелдиң “Автопоезд” деп акциязынга киржир

Россияның Украинада чорудуп турары тускай дайынчы операцияның киржикчилери дайынчыларга дузаны организастаар талазы-биле Республика штавының хуралы ТР-ниң Чазааның бажыңынга дүүн, март 21-де, болуп эрткен. Хуралды Тываның Баштыңы Владислав Ховалыг башкарып эрттирген.

ТР-ниң Чазааның Даргазының оралакчызы, тускай дайынчы операцияның айтырыгларының талазы-биле Тываның Баштыңының тус­кай төлээзи Т.Б. Куулар ТДО-нуң киржикчилеринге болгаш оларның өг-бүлелеринге көргүскен деткимче дуга­йында дыңнадыгны хуралга кылган.

Улусчу фронтунуң Тывада күүседикчи комитединиң даргазы Саима Далчин Россияның Улусчу фронтузу биле “Россияның демир-оруктары” акционерлиг ниитилел “Автопоезд” деп акцияны чарлаанын хуралдың киржикчилеринге дыңнаткаш, ол акцияны деткииринче кыйгырып, ТДО-да киржип турар чаңгыс чер чурттугларывыс дайын­чы­ларга кончуг херек берге оруктарга чоруп шы­даар машиналарны, квадроциклдерни чорударын саналдаан. “Автопоезд” деп акцияны деткиир талазы-биле ажылды Улусчу фронтунуң регион организациязы баш бурунгаар чоруткан болгаш, хөй-ниити организациялары, сайгарлыкчылар, муниципалдыг эрге-ча­гыргалар акция­ны деткээн. Олар шуптузу ма­шиналарны белеткеп турарын азы са­дары-биле акшаны чыып эгелээнин дыңнатканнар. Ол машиналарны апрель 10-да Абакан хоорайда демир-орук станциязынга чедирер ужурлуг. Оон ыңай “Россияның демир-оруктары” акционерлиг ниитилел улаштыр сөөртүп чоруптар.