Тываның уруглары удавас «Лео биле Тиг» мультфильмни тыва дылга көрүп эгелээр.
16.03.2023
Тывада чаа тургустунган автономнуг коммерциялыг эвес «Номад» гуманитарлыг шинчилелдер төвү ук мультфильмни тыва дыл кырынга очулдургаш, ону үндүрер тускай чөпшээрелди Россияда «Ноль плюс медиа» студиядан алган. «Номад» төп бо хүннерде Тываның хөгжүм-шии театрының база «Тет-а-тет» ойнаар-кыстар театрының артистери-биле кады ажылдажылганы чорудуп, мультфильмниң баштайгы сериязының үн бижидилгезин чорудуп эгелей берген. «Лео биле Тиг» мультфильм ниитизи-биле 26 сериялыг. Бижидилгени Чогаадыкчы үлетпүр школазының студиязында профессионал артистерниң киржилгези-биле бижидип турар. Тыва дылда мультфильмнерни көргүзери-биле “Ирбиштей” деп аңгы ютуб каналды ажыткан.
Автономнуг коммерциялыг эвес «Номад» гуманитарлыг шинчилелдер төптү төрээн дылының, тыва чаштарның келир үези дээш сагыжы аарып чоруур аныяк эртем ажылдакчылары Начын Монгуш, Артыш Монгуш, Аңчы Хомушку, Буян Адыгбай, Саян Саая олар ажыдып алган. Тыва бичии уруглар бичиизинден тура төрээн дылын өөренип, арыг, хостуг чугааланып алырынга тыва дылда «Лео биле Тиг» болгаш өске-даа өөредиглиг, солун болуушкуннарлыг мультфильмнер улуг идигни бээр деп аныяктар санап турар.
«Лео биле Тиг» мультфильмниң баштайгы 2 сериязының таныштырылгазын удавас хөй-ниити, сонуургалдыг улус, албан черлериниң киржилгези-биле Тыва улустуң ёзу-чаңчылдар, аас чогаал болгаш ус-шеверлер төвүнге эрттирер.
Возврат к списку
|