Тывада шылгараңгай башкыларны шилиир мөөрейниң республика чергелиг чадазы болуп эртер

Апрель 3-тен 8-ке чедир Россияның профессионал мергежил – 2023 мөөрейиниң республика чадазы болуп эртер. Хемчегге белеткел ажылы идекпейлии-биле чоруп турар. Бо чылын мөөрей 9 аңгы хевирге болур:

«Чылдың башкызы»;
«Чылдың аныяк башкызы»;
«Чылдың кижизидикчи башкызы»;
«Төрээн дылдар башкыларының Россия чергелиг мастер-клазы»;
«Психолог башкы»;
«Чылдың директору»;
«Чылдың тергиин эр башкызы – лидер болгаш дагдыныкчы»;
«Кижиниң кижизидикчизи»;
«Чылдың мастери».

Тывага «Чылдың башкызы» мөөрейни 1990 чылдан сайзырадып эгелээн. Россия мөөрейинге регионнуң башкылары бедик профессионал мергежилин болгаш чогаадыкчы чаяанын чаңгыс эвес удаа бадыткааннар.

2022 чылда Россияга республиканың адындан төлептии-биле чедиишкинниг киришкен башкылар:

Кызылдың 8 дугаар школазының психолог башкызы Наваждай Айдаш Владимирович, «Россияның психолог башкызы – 2022» профессионал мергежил мөөрейиниң 3-кү чергениң шаңналының эдилекчизи;

Тыва дыл болгаш чогаал башкызы Даржай Алдынай Владимировна Россияның төрээн дылдар башкыларының мастер-клазының «Чаартыкчы башкы» номинациязынга I-ги черге төлептиг болган.