Тыва каттышкан регион продуктузунуң өзүлдези-биле мурнунда 3 российжи регионнар санынче кирген

Федералдыг эксперттер 2022 чылда экономиктиг өзүлде талазы-биле лидер регионнарының санынче Тываны киирген. Республика каттышкан регион продуктузун 4,1 хууга өстүргеш, чуртта үшкү черни ээлээнин «Реальное время» интернет-солуннуң аналитиктери дыңнаткан. Тывадан ол көргүзүгнү чүгле Чечен Республика (4,2) база Курган облазы (5,41) ажырган.
Тываның экономиктиг хөгжүлде яамызының баш бурунгаар сан-чурагайы-биле алырга, 2022 чылда каттышкан регион продуктузун 95,2 млрд. рубльга, азы 2021 чылга (ынчан 86,59 млрд. рубль) деңнээрге 8,61 млрд. рубль хөйге бүдүрген. Пандемия мурнунда 2019 чылга деңнээрге, өзүлде 16 млрд рубльга дең.
Каттышкан регион продуктузунуң тургузуу база элээн өскерилгенин демдеглээр апаар. 10 чыл бурунгаар ол социал адырныы-биле хевирлеттинип турган болза, ам ооң үлүү 29,2 хууга кызырылган. Ам республиканың каттышкан регион продуктузунуң 47 хуузу экономиканың боттуг сектор адырынга – үлетпүр, тудуг, көдээ ажыл-агый, транспортка онаажыр.
Үлетпүр адыры эки бурунгаарлаашкынны көргүскен, 2021 чылга көөрде бүдүрүлге индекизи 137,1 хуу болган. Ажыктыг казымалдар – хөмүр-даш болгаш полиметалл руда тывыжы-биле өзүлде хандыртырган. Боттуң бүдүрген барааннарының хемчээли 32,1 хуу өскен - 27,4 млрд. рубльдан 36,3 млрд. рубль четкен.
Экономиктиг өзүлдеге дагжылардан аңгыда, чаа ажыттынган болбаазырадылга, пөс-таавы, тудуг болгаш өске-даа адырлар бүдүрүлгелери үлүүн киирген. «БТК групп» компанияның дааранылга фабриказы продукциязын 2,2 катап, бетон болгаш демир-бетон кылыглар бүдүрүлге бараанының хемчээли 1,5 катап, консервалар болгаш эът продукциязының бүдүрүлгези 3,5 хуу өскен.
Республика үлетпүр бүдүрүлгезиниң, чуртталга тудуун киирериниң, үүрмек садыглаашкын саарылгазының темпизин улгаттыргаш, Сибирь федералдыг округтуң регионнар аразында бирги черже үнген. Чыл дургузунда Тывада ажыл чок кижилерниң саны 10,5 муң ажыг кижиге кызырылган.