Тыва спортчулар кикбоксингиге Россия чемпонадынга база бирги чери дээш маргылдаага киржир эргени чаалап алганнар

Тыва Республиканың чыынды командазы кикбоксингиниң «Лоу-кик» хевиринге Сибирь федералдыг округунуң чемпионадынга база бирги чери дээш маргылдаага чедиишкинниг киришкеш, Россия чемпонадынга база бирги чери дээш маргылдаага киржир эргени чаалап алганнар. Кикбоксингиге Россияның спорт мастери Алибек Монгуштуң дыңнадыынга даянгаш, ТР-ниң Спорт яамызы ол медээни тараткан.
Эрткен дыштаныр хонуктарда, марттың 2-5-те, маргылдаа Иркутск хоорайга болуп эрткен. Сибирьниң 9 регионундан 560 спортчу киришкенин, Алибек Монгуш дыңнаткан. Ийи тренерге баштаткан 40 спортчу Тываның адын камгалап киришкеш, 19 алдын, 8 мөңгүн база 10 хүлер медальдарны чаалап алган. Республиканы төлээлээн үш судьяның ийизин – Эдуард Салчак биле Олча Монгушту тулган шииткекчилер кылдыр демдеглээн.
Кикбоксингиге Тываның чыынды командазында киржип турар республиканың муниципалитеттер төлээлеринден алырга, Улуг-Хем кожууннуң спортчулары эң хөй – 7 алдынны командага эккелген. Ооң соонда – 5 алдынны «Олимп» олимпийжи курлавырның спорт школазы чаалап алган. Ол ышкаш «олимпийжилер» 6 мөңгүн, 7 хүлер медальдарны ап, ниитизи-биле 18 шаңналдыг черлерни ээлээш, шылгараан. Мөңгүн-Тайганың спортчулары 3 алдын, Ак-Довурак биле Өвүрнүң 2-2 алдын медальдарны чаалап алганнар.