Тываның Баштыңы Арзылаң мөге Маадыр Монгуштуң мөчээни-биле кажыыдалын илереткен

Ат-сураглыг спортчу, Тыва Республиканың Арзылаң мөгези Маадыр Монгуштуң чүрээ 55 харлыында чүрээ турупкан дугайында кажыыдалдың медээзи бөгүн келген.
Тываның Баштыңы Владислав Ховалыг мөгениң чоок кижилеринге ханы кажыыдалын илереткен. Чоннуң ынак мөгези Маадыр Кавааевич хүндүткелдиг, бөдүүн сеткилдиг кижи чораан. «Ооң дугайында кажыыдал сөстери бижиири бүзүренчиг эвес-тир. Маадыр Кавааевич — эрес-дидим чоруктуң, езулуг тыва эрниң овур-хевирин илереткен кижи. Күчү-күш, мерген угаан, хүн бүрүде бодунуң мага-боду дээш ажылдаары, чаагай чаңчылдарын сагыыры ооң амыдыралының овур-хевири. Аныяк спортчуларга амыдыралды чаартып, бодунуң ынак чүүлүн кылып эгелээри кажан-даа орай эвес дээрзин бодунуң үлегер-чижээ-биле көргүскен дагдыныкчы. Алдар-аттыг мөге, биче сеткилдиг кижизиг кижи деп, Тываның чону ону хүндүлээр. Бистиң шуптувуска канчаар-даа аажок улуг чидириг-дир” – деп. Тываның Баштыңы бодунуң блогунда бижээн.
Маадыр Монгуш 1968 чылдың сентябрь 19-та Тываның Чөөн-Хемчик кожуунунуң Хорум-Даг суурнуң чанында Ораш-Хавак деп черде малчын турлагга төрүттүнген. Хостуг хүрешке РФ-тиң спорт мастери, Россия Федерациязының күш-культуразының тергиини, Тыва Республиканың алдарлыг ажылдакчызы хүндүлүг аттарның эдилекчизи. 1987 чылда Тыва АССР-ниң чемпиону, сумога Россия чемпионадының мөңгүн призёру, эвээш саныг чоннар аразынга хостуг хүреше Европаның бирги чери дээш маргылдааның хүлер медалының эдилекчизи, Тыва Республиканың Арзылаң мөгези, Моолдуң Баян-Ульгий аймааның Арзылаң мөгези.
Владислав Ховалыг чоннуң ынак мөгезин төлептии-биле сөөлгү оруунче үдээр даалганы республиканың Спорт яамызынга берген.