Тываның школачылары Брянск облазында бичии маадыр Фёдорну деткээн ажык чагаажыгаштарын чоруткан

«Лидер» элээдилер төвүнде барып турар Тываның кадет корпузунуң сургуулдары, аар балыгланза-даа, чүгле бодунуң эвес, а ийи уругнуң база амы-тынын камгалап кааш, ады-сураа бүгү чуртта алгый берген үе-чергези Фёдорга өөрүп четтиргенин илереткен ажык чагааны чоруткан.
Марттың эге хонуктарында, Брянск облазынга  үш школачыны – үшкү классчы Федор база ийиги классчы уругларны орукка сөөртүп чораан «Нива» автомашинаны украин диверсантылар атканын сагындыраал. Чолаачызы ол-ла черге чок болган, а оол балыгланы бергенин безин билбээн. Ол кады чораан уругларны машинадан үндүргеш, арыг иштинде чаштып дезе бергеннер...
Кезиишкин үезинде билдингени, Федяның иштики органнары болгаш улуг хан-дамырлары кемдээн болган.
Россияның Истелге комитединиң даргазы Александр Бастрыкинниң даалгазы-биле, эрес-дидим болгаш маадырлыг чоруу дээш. 10 харлыг Фёдорну ведомствонуң «Шылгарал болгаш эрем-дидим чорук» медалы-биле шаңнаан.
Тывадан оолдар, кыстар Брянск облазындан коргуш чок оолга өөрүп четтириишкинниң база чоргааралдың сөстерин дамчыдып, дүрген сегип келирин, өөредилгезинге чедиишкиннерни, тайбыңны болгаш аас-кежикти күзээн. “Кады бис!” – деп, Федяга бижээннер.