Тываның Чазаа «Тыва Республиканың социал камгалалының алдарлыг ажылдакчызы» хүндүлүг атты тургузар саналды киирген

Республика Чазааның сөөлгү хуралында, «Тыва Республиканың күрүне шаңналдарының дугайында» хоойлуже өскертилгелерни киирип, «Тыва Республиканың социал камгалалының алдарлыг ажылдакчызы» чаа атты тургузар дугайында хоойлу төлевилелин хүлээп ап, ТР-ниң Дээди Хуралынга (парламент) ону көөр кылдыр дамчыткан.
Регионнуң Күш-ажыл болгаш социал политика яамызы чурттакчы чоннуң социал деткимче болгаш социал хандырылга адырын хөгжүдеринге улуг үлүг-хуузун киирген хамаатыларны болгаш ажылдакчыларны шаңнап-мактаар сорулга-биле, документиниң төлевилелин ажылдап кылган.
Күш-ажыл яамызының Хоойлу төлевилелинге кошкан тайылбыр бижикте, республиканың социал камгалал адырында 2800 хире кижи ажылдап турарын айыткан. Хамаатыларның элээн хереглелдиг болгаш социал камгалалы кошкак кезээниң амыдырал-чуртталгазының шынарын экижидерин хандырары – оларның ажылының сорулгазы. Хүндүлүг атты бадылаптар болза, социал камгалал ажылдакчыларының эрге-байдалы бедиир.
Республиканың кол социал ведомствозу «Тыва Республиканың социал камгалалының алдарлыг ажылдакчызы» атты чоннуң социал камгалал адырында ажылдап чоруур бедик мергежилдиг ажылдакчыларга,  чоннуң социал камгалалының кол угланыышкыннарында эртем шинчилелдерин чорударынга, ачы-буянның аңгы-аңгы хевирлерин болгаш аргаларын хөгжүдеринге, социал хандырылга, социал деткимче (дуза), социал камгалал, пенсия хандырылгазы болгаш чонну ажылга хаара тударының шынарын экижидип база ону хөгжүдеринге ачы-хавыяазы дээш, чоннуң социал камгалал адырында 15 чылдан эвээш эвес үеде ажылдап чоруур, мергежилдиг специалистер  белеткелинде  эртем болгаш педагогика ажылдакчыларынга тыпсыр.
Вице-премьер Елена Хардикова башкарып турары ведомствозунуң хоойлужудулга инициативазын тайылбырлап тура, бо адырга ажылдаары кижиден уян-сеткилди, шыдамык чорукту база билиг-мергежилин доктаамал бедидип турарын негээр деп демдеглээн: «Боттарның ажыл-амыдыралын дузага хереглелдиг кижилерге тураскааткан социал камгалал адырында ажылдап чоруур дыка хөй профессионалдар ол шаңналга төлептиг» - деп, оралакчы дарга бодунуң блогунда бижээн.