Тываның яамыларында база ведомстволарында чаа томуйлаашкыннар

Тываның Баштыңы Владислав Ховалыг чамдык яамылар болгаш ведомстволарның дээди күрүне албан-дужаалдарынче томуйлаашкын дугайында каш доктаалга адын салган. Культура сайыдының бирги оралакчызында Илья Синкинни, одалга болгаш энергетика сайыдының бирги оралакчызында Суге-Маадыр Чуглурну, Националдар херектериниң талазы-биле агентилел директорунуң оралакчызында Анастасия Овчинникованы томуйлаан.
Илья Владимирович Синкин, Санкт-Петербургка төрүттүнген, 1997 чылда Ульяновскиниң хөгжүм училищезинге "фортепиано" клазын тергиин эки дооскан. П. И. Чайковский аттыг Москваның күрүне консерваториязынга "Композитор. Хөгжүм-теория эртемнериниң башкызы" мергежилди чедип алган. Ульяновск хоорайның хөгжүм училищезинге хөгжүм-теория эртемнерин башкылап, эртем-өөредилге комиссиязын эргелекчилээн. Кызылга, В. Көк-оол аттыг Национал хөгжүм-шии театрга уругларга "Дюймовочка" балетти ол тургускан. "Хөөмей" делегейниң эртем төвүнге тыва хөөмейни болгаш улустуң ырларын чара бижип, ноталарже дүжүрген. "Тыва улустуң ырылары болгаш ужур-чаңчыл хөгжүмү" деп номну белеткээринге (2015 ч.). хөгжүм редактору кылдыр киришкен. Үн режиссуразынга, рояльдар, фортепианолар хөөннеп, септээринге профессионал. Аңгы-аңгы жанрларга, камерлиг болгаш симфониктиг хөгжүм аялгаларын чогаадып бижип чоруур хөгжүмчү.
Суге-Маадыр Кумзат-оолович Чуглур, Кызыл хоорайга төрүттүнген, Санкт-Петербургтуг күрүнениң архитектура-тудуг университедин «Чылыг энергетиказы база чылыг техниказы» деп мергежилдиг дооскан. 2016 чылдан бээр одалга-энергетика болгаш чуртталга-коммунал угланыышкынныг бүдүрүлгелер болгаш организацияларга ажылдаан арга-дуржулгалыг. «Интеграция» КХН-ге, «Ленгипроинжпроект» КУБ-ка, «Кызылдың ЧЭТ» АН-га инженерлээн. Кызыл мэриязының хоорай ажыл-агый департаментизинге, “ЧЭК4 БК” ТР КУБ-ка килдис начальнигиниң оралакчызы, ТР-ниң Чуртталга-коммунал ажыл-агый яамызынга килдис начальниги бооп ажылдаан.
Анастасия Викторовна Овчинникова, Кызылга төрүттүнген, Санкт-Петербургтуң академиктиг университединге “Туризм” угланыышкыны-биле дээди эртемни чедип алган. Россия Федерациязының Президентизиниң чанында Россияның улус ажыл-агый болгаш күрүне албанының академиязынга “Күрүне болгаш муниципалдыг удуртулга” угланыышкынга эде белеткелди эрткен. Кызыл мэриязының культура, спорт болгаш аныяктар политиказы департаментиниң культура болгаш туризм килдизинге национал политика талазы-биле кол специалист тургаш, национал политика айтырыглары-биле ажылдап турган. Тыва Республиканың Экономика яамызы, Орус культура төвү база Националдар херектериниң талазы-биле агентилел дээн ышкаш ведомстволарга ажылдап тургаш, күш-ажылчы арга-дуржулганы мөөңнеп алган.
Ведомстволарда чаа томуйлаткан ажылдакчылар-биле бир чылдың күш-ажыл керээлери чардынган.