Тывада чаңгыс аай пособие төлевиринче 210 ажыг млн рубльди угландырган

Чаңгыс аай пособие дугайында хоойлу күш киргенден бээр, Тыва Республикада 16 муң ажыг уругга база 1300 ажыг иштиг херээженнерге төлевирлер дээш 210 ажыг млн рубль акшаны шилчиткен.
Россияның Социал фондузу чаңгыс аай пособиени социал казначейство хевирлиг томуйлаан. Ол дээрге, ада-ие төлевир алырда Күрүне ачы-дуза порталы таварыштыр билдириишкинни киирер. Арткан медээлерни ведомстволар аразында удур-дедир харылзашкаш, ИХЯ, ФҮА, Росреестр болгаш өске-даа органнар база информастыг система таварыштыр чоруттуруп алыр.
Ооң мурнунда ап турган социал деткимчелерни: бирги база үшкү уруг 3 хар четкижеге төлээр ай санының төлевирин, 3-7 харлыг база 8-17 харлыг уругларга ай санының төлевирин, иштиг херээженнерге ай санының төлевирин чаңгыс аай пособие солаанын сагындыраал.
Өг-бүлелер ооң мурнунда томуйлаан үстүнде шупту төлевирни хуусаазы четкижеге ап, чаңгыс аай пособиеже чоорту шилчиир. Хамааты кижи чаңгыс аай пособиеже кайы-даа үеде шилчип болур.
Россияда доктаамал чурттап турар российжи хамаатылар чаңгыс аай пособиени алыр. Төлевирни томуйлаарда, өг-бүлениң орулгаларынга база эт-хөреңгизинге ниити үнелелди кылыр, ол ышкаш ада-иенңи ажылдап турарын, азы чүге ажылдавайн турарын база өөренип көөр.
Россияның Социал фондузунуң Тыва Республикада салбарының регионнуң контакт-төвүнүң 88002000543 дугаарлыг телефонунче ажыл хүннеринде 09.00 шактан 18.00 шакка чедир долгааш, специалистерден тайылбырны ап болур.