Тываның Баштыңы Тыва Республиканың алдарлыг ажылдакчызы, Россияның Журналистер эвилелиниң кежигүнү Светлана Сюр-ооловна Монгуштуң чок болганы-биле ооң өг-бүлезинге кажыыдалын илереткен

Тываның Баштыңы Владислав Ховалыг, Тыва Чазактың кежигүннери республиканың хоочун солуннары - «Тываның аныяктары» биле «Шынны» удуртуп чораан ат-сураглыг болгаш салым-чаяанныг журналист, Россияның Журналистер эвилелиниң кежигүнү, Тыва Республиканың алдарлыг ажылдакчызы Светлана Сюр-ооловна Монгуштуң үр эвес аарааш чок болганы-биле ооң чоок болгаш төрээн кижилеринге ханы кажыыдалын илереткен.
Февраль 27-де Светлана Сюр-ооловна мөңге уйгузун удуй берген деп муңгаранчыг медээ дыңналып келген. Чоокта чаа-ла, Российжи парлалганың хүнүнде, профессионал байырлалында тыва журналистиканың хоочунун хүндүлүг аалчы кылдыр чазакка ужуражылгаже чалаан турган. Ужуражылга үезинде Светлана Сюр-ооловна республиканың солуннарга корректорлап, корреспондентилеп, оон кол редакторлап чораан күш-ажылчы оруун, арга-дуржулгазын, кады ажылдап чораан коллегаларын сактып, чалаткан эш-өөрү база аныяк журналистер-биле ону үлешкен.
Светлана Сюр-ооловна Монгуш 1952 чылдың август 11-де Сүт-Хөл кожууннуң Кара-Чыраа суурга аныяк башкылар Деспи Санааевна биле Сүүр-оол Хүргүлекович Ондарларның өг-бүлезинге дун уруу бооп төрүттүнген.
Светлана школаның эки өөреникчизи, отрядтың, дружинаның, комсомол организациязының секретары чораан. 1970 чылда Шагаан-Арыг ортумак школазын дооскаш, Кызылдың башкы институдунче дужаап киргеш, 1975 чылда «орус дыл болгаш литература башкызы» дипломныг дооскан. Күш-ажылчы оруун Ак-Туругнуң санаторлуг-кадыкшылга школазынга эгелээн. Амыдыралының аайы-биле 1976 чылда Кызыл хоорайже көжүп келгеш, комсомол обкомунга ажылдаан.
Светлана Сюр-ооловна профессионал ажыл-амыдыралының көвей кезии – 30 чылдары тыва журналистика-биле холбаалыг. «Тываның аныяктары» солунга корректорлап эгелээш, республиканың хоочун солуну «Шынның» редакциязын удуртуп, кол редакторлаан.
Светлана Сюр-ооловна тыва журналистиканың төөгүзүнде кол редакторнуң албан-дужаалынга ажылдаан баштайгы херээжен журналист. Ол «Тываның аныяктарын» 1985-1990 чылдарда, а тыва чоннуң ынак болгаш хүндүткелдиг «Шын» солунун 1998 – 2002, 2008-2013 чылдарда удурткан бирги херээжен редактор бооп тыва журналистикада ады мөңге арткан.
Тыва журналистиканың хөгжүлдезинге улуг үлүүн киирген хоочун журналист Светлана Сюр-ооловна Монгуштуң ажыл-херээ, ат-сывы, ат-алдары тыва чоннуң болгаш республиканың төөгүзүнге кажан кезээде артып каар.
Светлана Сюр-ооловнаның овур-хевири  сагыш-сеткилге кезээде чырып артар.