Сүт-Хөл кожуунда республиканың ус дарганнар мөөрейи эгелээн

Бөгүн Сүт-Хөл кожууннуң Суг-Аксы суурда республикада Башкы болгаш дагдыныкчының чылынга болгаш Тываның эң-не арга-дуржулгалыг дарганнарның бирээзи, республикада ады-сураа билдингир мастер Виктор Сакыйбанович Ондарның юбилейинге база Тыва үндезин культура төвүнүң 15 чылы биле 60 маадырларның тура халыышкынының 140 чылынга тураскаадып, Тываның Сүт-Хөл кожуунунуң Суг-Аксы суурда “Уран дарган” деп ус-дарганнарның республика мөөрейи бөгүн эгелээн.
Тыва Республиканың Культура яамызы, Тыва үндезин культура төвү база Сүт-Хөл кожуун чагыргазы мөөрейни саналдап, ону организастаан.
Февраль 28-тен март 1-ге чедир, ийи хонук дургузунда мөөрей программазы-биле хемчеглер эртер. Бөгүн ында “Тыва Республикада дарганнаашкын ижиниң чугула айтырыглары” деп темалыг “төгерик стол” болуп турар. Виктор Ондар «Аът дагазы» кылырынга мастер-классты эрттирер. Мөөрей эгелээр мурнуу чарыында, аалчылар «Сыр кагар» деп ёзулалды көөр, а кежээ «Тыва» аас чогаал ансамблиниң оюн-көргүзүү-биле программаның культурлуг кезээ доостур.
Кол хемчеглер март 1-де болур. 14.00 шак соонда жюри ажылдап эгелээш, 16.00 шакта тиилекчилерни шаңнап-мактаар.
Жюри киржикчилерниң уран аргазын, даганы кайы хире үеде сопканын, ооң шынарын, берген хемчээлинге дүүшкенин, ус шевергинин көөр. Бирден үшкү чер алган тиилекчилерге дипломнарны база акша сертификаттарын тыпсыр. Оон аңгыда тускай шаңналдар база бар.
Демир-биле ажылдаарының чаңчылчаан аргаларын арттырып, амгы үеде көс-биле ажылдаар чаңчылчаан болгаш чаа дериг-херекселдерни нептередип, дарганнар аразында культурлуг болгаш профессионал удур-дедир кады ажылдажылганы чорудар сорулгалыг республиканың уран дарганнарының чогаадыкчы ажыл-чорудулгазын деткип, мөөрейни эрттирип турар.