Тывада тудугга үлүүн киириштирген киржикчилер саны көвүдээн

Тывада үлүг киирилделиг тудуг институду шапкын хөгжүлдени алган. Росреестрниң республикада эргелели чүгле эрткен чылын хамаатылар-биле тудуг организацияларының аразында чарган 366 керээлерни бүрүткээн. Чыл бурунгаар, азы 2021 чылда, Тывага ындыг керээлер чардынмайн турганын деңнелгеге ап болур.
Бөгүнде Тывада «Восток», «Энергострой», «Новый город» база «Азимут» тудуг компаниязы - тускайлаттынган тудуг организациялары келир үеде бажың ээлериниң акша-хөреңгизин киириштирип, тудуг ажылдарын чорудуп турар. 2022 чылда үлүг киирикчилериниң киржилгези-биле Кызылда Суворов биле Олег Саган-оол кудумчуларда база Спутник микрорайонунда хөй аалдыг 5 бажыңны ажыглалче киирген.

Республикада ажылдап турар дөрт компанияга бо чылын «Трансстрой» башкарыкчы компания» тускайжыттынган тудуг организациязы каттыжып, «Мөңгүн» чуртталга комплекизиниң бирги ээлчээнде хөй аалдыг дөрт бажыңның тудуунче кирген. Республиканың чурттакчылары чаа тудуг организациязы-биле үлүүн киириштирер керээлерни чарып эгелээн. Ниитизи-биле 2424 дөрбелчин метр 6 каът бажыңда квартирага бирги керээни февраль 9-та бүрүткээн. «Мөңгүн» чуртталга комплекизиниң девискээринге аңгы-аңгы каъттарлыг хөй аалдыг 37 бажыңнарны тудары планнаттынган.

Үлүг киирилдези-биле туткан чуртталга бажыңын ажыглалче кииреринге чөпшээрелди берген соонда, тудуг организациязы дамчыдып-хүлээткен акты-биле тудугга үлүүн киириштирген киржикчиге квартираны дамчыдыптарга, ооң ээзи өнчү ээзиниң эргезинге күрүне бүрүткелиниң дугайында билдириишкинни киирер эргелиин Росреестрниң республикада эргелели сагындырган.