Тыва чоннуң Шагаа байырлалын Хакасияга бир дугаар калбаа-биле демдеглээн

Красноярск край, Хакас Республика база Тыва Республиканың девискээринде регионнарның социал-экономиктиг хөгжүлдезинче угланган “Енисей Сибири”  комплекстиг инвестиция төлевилел чорудуу-биле, Хакасияның төвү Абаканга тыва чоннуң Шагаа  байырлалын бир дугаар демдеглеп эрттирген. 

Абаканда С.П. Кадышев аттыг национал улусчу чогаадылга төвүнге  Тываның улуг байырлалдарының бирээзи, ай санаашкыны-биле Чаа чылды уткаан «Шагаа-2023»-тү байырлаан. Ук хемчегге сонуургал улуг болганындан, төптүң концерт залынга кижи бажы кизирт болган.

Тываның болгаш Хакасияның ус-шеверлериниң национал суй-белектериниң ярмарка-садыглаашкынындан сонуурганчыг чүнү-даа тып ап болур. Ийи республиканың уран чүүл мастерлериниң концерти, национал хептер көрүлдези хөйнүң кичээнгейин хаара туткан.

Тыва аас чогаалынга: дүрген чугаага, узун тынышка, кожамыктарга, үлегер домактар ыдарынга мөөрейлер байырлалды ажыткан. Тыва оюннар маргылдаазы, уругларның чураан чуруктарынга мөөрейлер кымны-даа тоомча чок арттырбаан.

Тываның база Хакасияның албан езунуң төлээлери «Шагаа-2023» байырлалын ажыдып, киришкен. Бистиң региондан Тыва Республиканың Чазааның даргазының оралакчызы Уран-оол Ондар чыылган чонга Шагаа байырлалы-биле байырын чедирип, бо чараш чаңчыл ам-даа уламчылаар боор деп идегелин илереткен. Хакасияда сес муң ажыг бистиң чаңгыс чер чуртугларывыс чурттап турар-даа болза, тыва чоннуң Шагаа байырлалын республика деңнелинде бир дугаар демдеглээннер. Тывада Чоннуң чаңгыс эп-сеткилиниң чылында хемчегни эрттирип турары улуг ужур-уткалыг.

Хакас Республиканың Баштыңының - Хакас Республиканың Чазааның Даргазының бирги оралакчызы Татьяна Курбатова, территориалдыг болгаш регион политиказының министри Лев Сафьянов база Хакас Республиканың культура министри Светлана Окольникова байыр чедириишкинниг сөстерни алган.

Тыва Республиканың уран чүүл мастерлери – “Саяннар” Тываның национал ыры болгаш сам ансамбли,  «Тыва» аас чогаал ансамбли, «Эдегей» танцы болгаш костюм театры, «Алаш», «Чиргилчин», «Одучу» база «Khoomei Beat» хөгжүм коллективтери байырлалдың концертин каастаан. С.П. Кадышев аттыг национал улусчу чогаадылга төвүнүң солистери – Тываның улустуң артизи  Альберт Кувезин, Россияның улусчу чогаадылгазының алдарлыг коллективи «Час ханат» уругларның эстрада студиязы база Хакасияның улусчу чогаадылгазының алдарлыг коллективи «Айас» уругларның хореография студиязы  чогаадыкчы байыр чедириишкиннерин бараалгаткан. 

 Төптүң улуг залынга, Тыва хөөмей мастерлериниң “Хөөмей симфониязы”  этниктиг хөгжүмнүң база Хакасияның В.Г. Чаптыков аттыг республика филармониязының симфониктиг оркестриниң концерти-биле байырлал доозулган.

Хакас республиканың национал болгаш территориалдыг политика яамызының, С.П. Кадышев аттыг национал улусчу чогаадылга төвүнүң, Хакас Республикада Тыва чаңгыс чер чурттугларның деткимчези-биле Хакасияның Культура яамызы хемчеглерни организастап эрттирген.