Тываның найысылалынга Масленицаны калбаа-биле байырлаан

Тываның найысылалында Масленица неделяның сөөлгү хүнүн хөглүг, солун, уттундурбас кылдыр чон байырлаан. Арат шөлүнге 1,5 муң хире кызылчылар болгаш аалчылар чыглып, кышты үдээн.
Тываның Баштыңы Владислав Ховалыг кышты үдээн Масленица-биле республиканың чурттакчыларынга байырын чедиргеш, бо байырлал Шагаа ышкаш, Тываның шупту чонунуң шажын чүдүлгезинден хамаарылга чокка ынак байырлалы деп демдеглээн. «Байырлалдың аас-кежиин аравыска үлежир бис» - деп, ол чугаалаан.
Арат шөлүнге садыглажылга майгыннары чаңчыл езугаар типтинипкен, хоорайның «Енисей» культура бажыңының ажылдакчылары келген чонга оюн-тоглааларны организастаан. Шоодайлар кеткеш чаржырынга, кидис идиктер ырадыр октаарынга дээш, өске-даа оюннарга чон киришкен. Эң идепкейлиг хоорайжыларга чигирзиг шаңналдарны тудускан.
Республиканың националдар херектериниң талазы-биле агентилелдиң организастааны «Масленица девискээри-2023» конкурска дөрт муниципалдыг тургузуг: Каа-Хем, Бии-Хем, Таңды база Кызыл кожууннар киришкен. Киржикчилерниң экспозицияларын база уран чогаадылгазын үнелеп көргеш, жюри бии-хемчилер тиилээнин чарлаан. Ийиги, үшкү черлерни Таңды биле Кызыл кожууннар үлешкен. Ниитизи-биле 100 муң рубль түңнүг акша сертификаттары-биле дипломнарны тиилекчилерге тывыскан.
Кызыл хоорайның үжен хире уруглар садтары ара-аразында мөөрейлежип, байырлалды улам каастап, тоолчургу аян-шинчини киирген. Чоннуң хөглээшкининде келген улуг-биче кижилер блинылар болгаш быжырган кылыгларның 100 ажыг хевирлерин амзап чооглаан.
Шөлдүң орутузунда тургускан чагы кырынче үнер мөөрейге эң-не кашпагай, чиик адак кижилер боттарын көргүскеш, бажың эт-херекселдери база эдилелдерин ойнап алган.
Орус культура төвүнүң ажылдакчыларының тургусканы улуг Матрешкалыг база Адыглыг чурук тырттырар булуңунда кижи дээрге кижи болган. Таңды кожууннуң Белдир-Аргы суурга тус черниң Масленица байырлалын каасташкаш келген орус ырының «Раздолье» ансамбли бо удаада база аалчыларны чалгааратпаан.
Масленица – чоок кижилер база эш-өөрү-биле кады ойнап-хөглеп, кышты үдээриниң бир чараш байырлалы. Ол хүн блиныларның каш янзызын чип болур. Эң хөйнү чиир болза, чыл тодуг-догаа болгаш аас-кежиктиг болур деп санаттынар. Православ чүдүлгелиглерге понедельниктен эгелеп эң шыңгыы, 40 хонуктуң Улуг пост хүннери эгелээр.