Тываның Чазаа биле Соңгу чүк, Сибирь болгаш Ыраккы чөөн чүктүң биче буурай үндезин чоннарының ассоциациязы Кады ажылдажылга дугайында керээге аттарны салган

Тываның Баштыңы Владислав Ховалыг база Россия Федерациязының Соңгу чүк, Сибирь болгаш Ыраккы чөөн чүктүң биче буурай үндезин чоннар ассоциациязының президентизи Григорий Ледков ажыл-агыйжы ужуражылга үезинде керээге атты салганнар.

Сибирьниң биче буурай үндезин чоннарының общиналар ассоциациязының “Тос-Чадыр” тожу тываларының президентизи Светлана Дёмкина биле Ассоциация аппарадының ажылдакчызы Иван Трофимов олар ужуражылгага киришкен.

Ужуражылганың киржикчилери Тыва Республикада чурттап турар биче буурай чоннарның чидиг айтырыгларын, соңгу чүк иви ажыл-агыйын кадагалап база деткиирин, аңныыр-тывыш айтырыгларын сайгарып чугаалашкан.

Федералдыг болгаш регион программаларын боттандырынга кады киржирин база деткиирин, социал-экономиктиг болгаш культурлуг хөгжүлдеге хамааржыр информастыг ажыл-чорудулганы боттандырарын, биче буурай үндезин чоннарның айтырыгларын шиитпирлээринче база эрге-ажыын камгалаарынче угланган хемчеглерни кады эрттирерин дугуржулгада киирген.

Ужуражылганың түңнелинде, информастыг-эрге-хоойлу семинарын Тыва Республиканың девискээринге эрттирер дугайында шиитпир хүлээп алдынган.