Ада-чурт камгалакчызының хүнүнде Тиилелге шөлүнде тураскаалга боодал чечектерни салган

Ада-чурт камгалакчызының хүнүнде Кызыл хоорайда Тиилелге шөлүнге байырлыг митинг болуп эрткен.

 Аңаа Ада-чурттуң Улуг дайынының болгаш өске-даа дайыннарның киржикчилери-биле кады ТР-ниң Баштыңы Владислав Ховалыг, Россияның Маадыры Мерген Доңгак, Тываның Дээди Хуралының (Парламент) Даргазы Каң-оол Даваа дээш өскелер-даа киришкен. Патриотчу акцияга хөй-ниитижилер болгаш эрге-хоойлу органнарының ажылдакчылары, студентилер дээш, хөй кижилер чыылган.

“Ада-чурт камгалакчызының хүнү чүгле байрылал эвес, а үе дүптен бээр бо үеге чедир төрээн черин эжелекчилерден маадырлыы-биле камгалап чоруур российжи дайынчыларның шупту салгалдарынга хүндүткелдиң ёзузалы болур. Салгалдан салгалче дамчаан дайынчының ат-алдары-биле Россия сурагжаан. Тывавыстың оолдары, төрээн чуртувустуң камгалакчылары, өгбелерниң, тыва эки турачыларның, интернационалчы дайынчыларның маадырлыг чоруун катаптап, Россияның Чепсектиг күштериниң одуруунда албан хүлээлгезин төлептиг күүседип турарлар. Тускай шериг операциязының үезинде эрес-дидим чоруу-биле онза ылгалган чаңгыс чер-чуртугларывыс – тыва чоннуң чоргааралы. Россияның Маадырлары Мерген Донгак база Сергей Кужугетович Шойгу амгы Россияның төөгүзүнде онза исти арттырган. Эр кижи, элээди болгаш бичии оолдар оларга деңнежир дээш, төлептиин көргүзер ужурлуг” – деп, митингиниң киржикчилери демдеглээн.

Хүндүлүг аалчылар сөс ап, байыр чедирген соонда, кажыыдалдың минутазын чарлааш, боодал чечектерни салып, мөгейгеннер.