Ада-чурт камгалакчызының хүнүнде Тывага патриотчу концерт болуп эрткен

Бөгүн, февраль 22-де, Кызыл хоорайның Арат шөлүнге чылдың-на февраль 23-те Россияга демдеглээри Ада-чурт камгалакчызының хүнүнде, митинг-концерт болуп эрткен.
Хөй-ниити организацияларының төлээлери, республика найысылалының тоомча чок эвес чурттакчылары ук хемчегге киришкен.
Тываның Баштыңы Владислав Ховалыг, Тывада федералдыг инспектор Монгуш Шолбан, 55-ки аңгы мотоадыгжы бригаданың (дагжы) командириниң албан-хүлээлгезин күүседип турар Азат Фатхутдинов, ТР-ниң шериг албанныгларының “Кара ирбиш” регион хөй-ниити организациязының удуртукчузу Монге Тагба байырлалдың сөзүн алганнар.
Чурттуң хамаатыларның хөй кезии тускай шериг операциязын деткээн үзел-бодалын илереткен деп Президент Владимир Путин Федералдыг Хуралынга Айыткалында демдеглээнин, Владислав Ховалыг чугаалаан.
«Ынчангаш бо байырлал онза уткалыг. Ада-чурттуң камгалалында бистиң 3 муң хире чаңгыс чер чурттугларывыс киржип турар. Ада-чурттуң камгалакчыларынга хүндүткелди болгаш чоргааралды илередип, Төрээн чуртувусту камгалаар дээш тулчуушкунга бажын салган маадырларны кезээде сактып чоруур бис» - деп, Тываның Баштыңы чугаалаан.
Ада-чурт камгалакчызының хүнүнге тураскааткан концертти республиканың чогаадыкчы коллективтери патриотчу ырылар-биле каастаан.
Дайынчы хөделиишкиннер үезинде мөчээн дайынчыларга, хоочуннарга тураскааткан сактыышкын хемчеглери бо хонуктарда бүгү чуртта эртип турарын сагындыраал.