Тываның Баштыңы Росавиацияның удуртулгазы-биле ужурашкан

Тываның Баштыңы Владислав Ховалыг Москвага ажыл-агыйжы сургакчылаашкынының үезинде, Агаар транспортунуң федералдыг агентилелиниң удуртукчузу Александр Нерадько-биле ужурашкан. Ужуражылга үезинде, республиканың найысылалы биле чурттуң өске регионнарының аразында маршрут четкизин ам-даа хөгжүдериниң, ол ышкаш регионнар аразында авиарейстерге немелде субсидия бээриниң айтырыгларын чугаалашкан.
Владислав Ховалыг Тывада авиатранспортту тудары аар-даа болза, оон өске арга чогун демдеглээн. Ынчангаш республика агаар аргыжылгазының инфраструктуразын хөгжүдеринге чугула болгаш тускай сорулгалыг ажылдарны чорудуп, маршруттарга субсидия бээр программада идепкейлиг киржип турар.
Программа күүселде-биле Кызылдан беш угланыышкынче – Москва, Красноярск, Новосибирск, Улан-Удэ база Иркутскче ужудуп турар апарган. Пассажирлер аргыжылгазы 5 чыл иштинде 3 ажыг катап көвүдээн - 24,7-ден 91,2 муң кижи четкен, а рейстерниң долганы 76 – 80 хуу чеде берген.
Росавиацияның дузазы-биле шиитпирлеттинер айтырыгларны база чугаа аразында көрген. Александр Нерадько субсидиялыг рейстер хемчээлин немей өөренип, чиигелделиг тарифтер-биле ужудуушкуннар географиязын калбартырынга барымдааны чазак комиссиязының адрезинче киирерин сүмелээн.
«Кызыл» аэропортунда делегей чергелиг эрттирилге пунктузун чаагайжыдар ажылдар кайы хире чоруп турарын аңгы чугаалашкан. 2023 чылда делегей чергелиг терминал белен апаарын Владислав Ховалыг дыңнаткан. Тываның найысылалындан Кыдатче база Моолче ужудуушкуннарны организастаар дугайында чугааларны бөгүнде российжи база даштыкы авиакомпаниялар-биле чорудуп турарын чугаалаан.
Росавиацияның удуртукчузу Кызылдан чурттар аразында ужудуушкуннарны ажыдарынга херек дузаны көргүзерин аазаан. Агаар аргыжылгазының дугайында чазак дугуржулгазының негелделеринге дүүштүр ужудуушкуннарны кылыр деп, ол тодаргайлап айыткан.
Аэропорттуң өртке удур айыыл чок чоруктуң деңнелин бедидер, аэропорт чоогунуң девискээрин чаагайжыдып, эде чаартырының планнарын база чугаалашканнар.