Тываның чурттакчылары «Донбасс 2022» фотоделгелгеден ТШО үезиниң болуушкуннарын көрүп болур

«Российская газета» солуннуң фотокорреспондентизи Владимир Аносовтуң «Донбасс 2022» автор делгелгези Кызылда Туризм бажыңынга февраль төнчүзүнге чедир ажылдаар. Тускай шериг опреациязының зоназында сөөлгү айларда болуп турар болуушкуннарны көргүскен фоточуруктар көрүкчүлерниң кичээнгейин хаара туда бээр. Мариуполь, Волноваха, Донецк, Лисичанск база Луганск дээш, ам российжи хоорайлар апарган өске-даа черлерден ховар кадрлар ында делгеттинген.

Тыва Республиканың Баштыңы Владислав Ховалыг бодунуң блогунда ук хемчегниң дугайында бижээн: «Экспозицияны Сибирьден Тыва бир дугаарында хүлээп алган. Ол шилилге дээш «Российская газета» солуннуң редакциязынга четтирдим».

Владимир Аносовтуң тырттырган чуруктарының бирги делгелгези 2022 чылдың июньда «Российская газета» солуннуң Москвада редакциязынга делгеттинген, оон чаа ажылдарны немээш Краснодарга, дараазында сентябрьда Сочи хоорайга амгы журналистиканың «Вся Россия» шуулганының киржикчилеринге таныштырган.

Делгелге Тывага кээр мурнунда, Самарага, Санкт-Петербургда Нева проспектиге, Великий Новгородтуң Тиилелге шөлүнге, Ростовка, Ставропольга, Оренбургка, Россияның эң барыын чүгүнде региону Калининград облазының Светлогорскыга, Саранск хоорайларга ажылдаан.

Фоточуруктарда – дайынчы корреспондентилерниң ажыл хүнү, российжи шериглерниң портреттери, дайынчы техникалары, украин националистерниң октапканы кол пунктулары, хосталган черлерде тайбың чуртталгаже эглип кээп турар чурттакчылар, тускай шериг операциязының болуушкуннары...

Владимир Аносов – халажылгада шериг кадр, курлавырда майор. Шериг училищезиниң соонда авиацияга албан эрттирген, ийи чечен компанияларның киржикчизи. Чепсектиг күштерден халашкан соонда, журналистикаже кирген. «WorldPressPhoto» профессионал фоточуруктар делегей конкурузунуң киржикчизи. «Золотой объектив», «Искра Юга» база өске-даа бүгү-российжи болгаш регион фотоконкурстарның тиилекчизи.