Тывада ковидтен аараан кижилер саны неделя дургузунда ийи катап көвүдээн

Росхереглелхайгааралының регион эргелелиниң удуртукчузу Людмила Салчак коронавирус халдавырындан аараан таварылгаларның сан-чурагайын дыңнаткан. Февральдың 4-тен 10-га чедир республикада covid-19-тан аарааны лабораторияга бадыткаттынган 301 кижи илереттинген. Ооң мурнунда неделяга деңнээрге (115 таварылга), аараан кижилерниң саны ийи катап көвүдээн.
Кол санитар эмчи бир эвес аарыг көдүрлүр болза, кызыгаарлаашкынныг хемчеглерни киирип болурун дыңнаткан. Ону киирбес дизе, профилактика хемчеглерин күштелдирип, ону сагыырын шыңгыы контрольга алыр. Тываның Баштыңы Владислав Ховалыг бюджет организациялары маска чурумун, эртенги хыналданы, арыглап-дезинфекциялаар хемчеглерни кылып турарынга хыналданы чорударын негээн.
Ыраккы Мөңгүн-Тайга, Тере-Хөл база Тожу кожууннар дээш, республиканың шупту муниципалдыг 19 тургузугларында ковидтээн кижилер демдеглеттинген. Регионнуң найысылалы Кызыл хоорайда эрткен неделяда эң хөй – 178 кижи аараан.
Эмнелгелерде 367 кижи эмнедип чыдар, эрткен неделядан 228 кижи хөй. 278 аарыг кижи амбулаторлуг эмнээшкинде болза, 89 кижи чыдар эмнелгелерде. Алды кижиниң байдалы аар.
Шагаа, Ада-чурт камгалакчызының байырлалы дээн ышкаш, массалыг хемчеглерни эрттирерде ону өөренип көөрүн, Людмила Салчак дыңнаткан. Эпидемиологтуг байдалды нарыыдатпазы-биле элээн каш негелделерни тургузар дугайында саналды регионнуң Баштыңынче киирген. Мөргүл номнары эртер хүрээлеринде, хөй-ниити транспортунда, хөй кижилер чыглыр черлерде аштап-арыглаашкынны шыңгыы контрольга тудар. Аарыгның көдүрлүүшкүнүн болдурбазы-биле, уруглар садтарынга эртер байырлалдың эртенги хемчеглеринче база өске-даа оюн-тоглааже уругларның ада-иезиниң чаңгызы киржип болурун чөпшээрээн.
Бо неделяда эпидемиологтуг байдалды көрүп, хемчегни онлайн чурумга эрттиреринге чедир, элээн шыңгыы хемчеглерни киирер.
Байырлал хемчеглерин эрттирерде ведомстволар база албан черлериниң эпидемиологтуг айыыл чок дүрүмнерин сагып турарын: камгалал маскалары, дезинфекция холуксаалары, дериг-херекселдериниң барын хынаар, халдавырлыг аарыгларны болдурбас дээн ажылды чорудуп турарынга хыналданы кылырын Владислав Ховалыг бодунуң оралакчызы Юрий Ананьинге дааскан.