Февралдың 25-те Тывага ивижилерниң чаңчылчаан фестивалы болуп эртер

Тожу февраль 25-те планнаан ивижилер фестивалының аалчыларын хүлээп алырынга белеткенип эгелээн. Байырлал кожуун төвү Тоора-Хемден ырак эвесте бирги оймакка болурун организаторлар дыңнаткан. Фестиваль үезинде ийи «төгерик столду» эрттирер: эвээш санныг үндезин чоннарның культура база дылының байдалын, тожу ивижилериниң ужур-чаңчылдарының, амгы үеде байдалының, оларга деткимче хемчеглерниң дугайында.
Тожу кожууннуң ивижилери база чурттакчы чону национал идик-хевин, суй-белектерин, аңныыр тывыжын база бойдус байлаан делгээн ярмарка-садыглаашкынны болгаш өңгүр-каас чыскаалын фестивальдың аалчыларынга сонуургадыр. Тос чадырлар көрүлде мөөрейин организастаар. Ивижилер «Ыраажы ивижи» ыры мөөрейинге бодунуң талантызын бараалгадыр. Иви чаражы, малды дүрген эзертээри, аңнаар хаакка чарыш, ыяш хирээлеп, чарарынга, ча адарынга эрлер мөөрейлежир. Ивиниң эң эки дерилгезинге мөөрей чарлаттынган. Тус чер аныяктарының байырлыг бадылажылгазы байырлалды каастаар.
Республиканың Шүүгү яамызы Тожунуң ивижилеринге юридикиг консультацияларны феставаль хүннеринде организастаар.
Тожунуң ивижилериниң кол байырлалы - фестиваль ийи чылда бир катап болуп турар. Тожуга ол үеде чеде берген аалчылар Тываның биче буурай үндезин чонунуң амыдырал-чуртталгазы-биле чоок таныжар аргалыг.