Россияда эң улуг дээн сарыг шажын хүрээзиниң ажыдыышкынын соңгаарлаткан

Россияда эң улуг буддийжи хүрээ – Чырыткылыг 14-кү Далай-Башкының бодунуң айызааны Кызыл хоорайда «Тубтен Шедруб Линг» хүрээниң февраль 21-де болур турган ажыдыышкыны элээн соңгаарлаттынган. Кужугет Шойгу аттыг культура фондузунуң парлалга-секретары Антон Тарханов ооң дугайында дыңнаткан.
«Февраль 21-де деп демдеглеттинген хүрээ ажыдар езулалдың хүнүн чылдырган» - деп, Тарханов чугаалаан.
Февральда хүрээни чүгле ажыдары “бирги ээлчегде” планнаттынган турган, организастыг ажылдар ужун ону аткаарлаткан. Хүрээ тудуун албан езузу-биле ажытканының соонда, шажынчы езу-демдектер-биле иштин шеверлеп база долдурар ажылдар база бар. Албан езузунуң ажыдыышкын хемчээн чылдырганы, тудуг ажылдарының план езугаар графигинге салдар чедирбезин демдеглезе чогуур. Ынчангаш хүрээ ажыдыышкынының хүнү ажык болуп арткан, ону оон чарлап дыңнадыр.
Тоймаглаттынган тыва хүрээлерниң шажын чүдүлге эдилелдеринден чыгдынган экспозициялыг Алдан-Маадыр аттыг Тыва Республиканың Национал музейиниң филиалы хүрээниң бирги каъдынче көжер. Экспонаттарның ниити саны үш муң ажып турар.
Хүрээниң эгеки общиназын 15 кижи тургузар: Индияда тибет хүрээлерден чалаан алды лама, а артканнары – тыва лама башкылар болур. Хүрээге ажылдаар ламалар саны оон-даа немежир болганда, 30 башкыга хөй-ниити чуртталга бажыңын тудары планнаттынган.
Кужугет Шойгу аттыг культура фондузунуң инициативазы-биле, 2022 чылдың ноябрь 10-да XIV Далай-лама Тензин Гьяцо Индияда Дхарамсала хоорайда бодунуң резиденциязынга тыва делегацияны уткуп алган. Делегейде буддистерниң шажынчы баштыңы (Россияда буддизм эдерикчилериниң хөй кезии Гелуг школазынга хамааржыр) шажынны камгалаан бодунуң авыралынче хүрээни ап, Будда Шакьямуниниң реликвиязын (хүлүн), бодунуң шажынчы хевин, бодунуң адын салган буддийжи ыдыктыг судурларны российжи чаа хүрээге белек кылдыр сөңнээн. Хүрээге эртер өөредилгелерниң камгалакчылары кылдыр Авалокитешвара энерел сеткил бурганының алды холдуг Махакаланы (Далай-лама чер кырында Авалокитешвараның дириг бодаралы болур) боду айыткан.
РФ-тиң камгалал сайыды Сергей Шойгунуң инициативазы-биле Кужугет Шойгу аттыг культура фондузунуң деткимчениң ачызында, Далай-лама 1992 чылдың сентябрь 21-де Тывага чаңгыс катап кээп чорааш хүрээ турар кылдыр айызаан черинде, «Тубтен Шедруб Линг» хүрээни тудуп дооскан.