Тывада тускай шериг операциязының киржикчилеринге база бир эмчи чиигелдезин берген

Республиканың Кадык камгалал яамызы Тыва Республиканың Баштыңы Владислав Ховалыгның даалгазн күүседип, керээ азы эки тура-биле тускай шериг операциязынга киржир дээш шериг албанынче чоруп турар кижилерниң эмчи шинчилгезин халас организастаар дугайында шиитпирни хүлээп алган. Шериг албанныгларга көргүзер чиигелделиг эмчи ачы-дузазының даңзызынче деткимчениң ол хемчээн немей киирген.
Республика Баштыңының адынче хамаатының социал четки таварыштыр кирген дыңнадыын үндезинге алгаш, республиканың шериг комиссариадының бижии-биле эмчи комиссиязын эртер эки турачылар база керээ чарган кижилерни эмчи шинчилгезин халас эртер дугайында шиитпир хүлээп алдынган. Эмчи комиссиязының тускай эртемниг специалистеринден справкалар алыры төлевирлиг дээрзин хамааты кижи бодунуң дыңнадыында дыңнаткан. Эмчи шынзыдылгазы алыр кижилер аразында хөй ажы-төлдүг, ажыл чок, эвээш орулгалыг дээш, кандыг-даа бөлүктерге хамааржыр кижилер туруп болурун бижээн. Олар Төрээн чуртун камгалап, фронтуже чоруур дээш эмчи комиссиязын эртип турарын ол айыткан. Тываның Баштыңы чөптүг барымдааларга чөпшээрежип, ол ажылды организастаар даалганы Кадык камгалал яамызынга берген.
Айыттынган категорияның кижилери Тыва Республиканың Шериг комиссариадының азы ооң килдизиниң бижиин көргүскеш, эмчи шинчилгезин халас эртип алыр.
2022 чылда Владислав Ховалыгның даалгазы-биле, тускай шериг операциязының 159 киржикчизи база оларның өг-бүлелериниң кежигүннери реабилитация болгаш амбулаторлуг-поликлиника дузазын эмчи дузазын халас көргүзерин күрүнеден магадылаан девискээр программазы-биле (ЫМК хуудузу-биле) алганын сагындыраал.
Шериг албанныг кижиниң болгаш ооң өг-бүле кежигүннериниң эмчи камгаладылгазының хуудузу чок болза, шериг кезээнден амбулаторияга баш бурунгаар шинчилге эртер бижик-биле Республиканың 2 дугаар эмнелгезинче барып болур. Шинчилгениң түңнелдери-биле, «Серебрянка» санаторийинге азы республиканың 1 дугаар эмнелгезиниң реабилитация салбырынга чогуур эмнээшкинниг реабилитация хемчеглерин алыр.
Республиканың консультативтиг-диагностика төвүнге, республиканың уругларның катап тургузар эмнээшкин болгаш реабилитация төвүнге, республиканың халдавырлыг аарыглар эмнелгезинге “ногаан коридор” оруу-биле шериг албынныг кижиге база ооң өг-бүле кежигүннеринге реабилитацияны чорудар.
Республиканың психиатрия эмнелгезиниң психотерапевтизи база клиниктиг психологу шериг албанныгларга – тускай шериг операциязының киржикчилеринге, мобилизастаттынган ажылдакчыларның өг-бүлелеринге болгаш төрээн кижилеринге психологтуг дузаны көргүзер. 8-800-2000-122, 8(39422)6-00-07, 8-962-062-3333 дугаарлыг бүзүрел телефоннарындан бедик мергежилдиг специалистеринден консультацияны ап болур. Специалистерниң хүлээп алыышкынынче 6-34-08 телефон таварыштыр бижидип ап болур.