Тывада «омикрон» коронавирус халдавырының «кракен» хевири-биле аараан бирги таварылга демдеглеттинген

Тыва Республиканың кол санитар эмчизи Людмила Салчак республикада коронавирус халдавыры-биле аараан кижиниң биологтуг материалын шинчээн соонда, ында «омикрон» коронавирус халдавырының «кракен» хевири бары бадыткаттынганын дыңнаткан. «Кракендан» аараан Россия Федерациязында ийи дугаар, Сибирь федералдыг округда база Тыва Республикада бир дугаар таварылга кылдыр ол демдеглеттинген.
Тываның Баштыңы Владислав Ховалыг регионнуң чурттакчы чонундан серемчилелди кошкатпазын база маска чурумун сагыырын, а бүгү деңнелдиң удуртукчуларындан административтиг черлерге, өөредилге албан черлеринге, хөй-ниити транспортунга, хөй-ниити черлеринге арыглаашкын ажылдарын шыңгыы хыналдага алырын негээн.
Регионну быжыглаан Иркутскиниң чумага удур институдунга биологтуг материалды хынаанын Росхереглел хайгааралының регионда эргелелиниң удуртукчузу дыңнаткан. Шинчилелдиң түңнели январь төнчүзүнде келген. Республикадан дашкаар чораан херээжен кижи аараанын эпидемиологтуг истелге илереткен. Аарыг кижиниң чоок харылзаалыг кижилери – өг-бүлезиниң, ажылдап турар коллективиниң кежигүннеринде аарыг кижилер илереттинмээн. Аарыг кандыг-даа бергедээшкин чокка, чиик эрткен. Үезинде тарылга албаанындан, иштиг кижи аараан болган. Аарыг кижи амбулаторлуг эмнээшкинниң долу курузун алган, январь 25-те экирээни шынзыттынган.
Амгы бо үени алгаш көөрге, коронавирус халдавырындан аарыыр чорук январь 26-дан хүн бүрүде көвүдеп турарын кол санитар эмчи демдеглээн. Ооң мурнунда неделяда 56 таварылга демдеглеттинген болза, эрткен неделяда 89 четкен. Колдуунда 30-ден 49 хар назылыг болгаш 7-14 харлыг уруглар аарып турар. Бичии уруглардан аарып турарларның үлүү - 30,7 хуу.
Эрткен неделяда ОРВИ-ден аараан 1035 таварылганы бүрүткээн, ооң мурнунда үеге бодаарга 39,5 хуу хөй.
Эмнелге, социал албан черлерде, хөй кижилер чыылган черлерде хууда камгалал чүүлдерин (камгалал маскалар) албан ажыглаар дугайында ТР-ниң Баштыңының чарлыы республика девискээринде ам-даа күштүг дээрзин кол санитар эмчи  сагындырган. Айыттынган организацияларның талазындан ол негелделерни сагып турарынга контрольду күштелдирер. Организацияларга, ылаңгыя өөредилге албан черлеринге эртенги “шүүрелдени” чорудуп, арыглаашкын ажылын күштелдирер негелде күштүг хевээр.
Уруглар хаара туткан коллективтер: школаларда, уруглар садтарында база өске-даа социал албан черлеринде профилактика хемчеглерин сагып турарынга онза контрольду чорудар.
Коронавирус инфекциязын чыпшырган таварылгалар көвүдээни-биле, катап тарыдар үезин эрттирбейн тарждып алырын чурттакчы чонга Тываның Баштыңы Владислав Ховалыг сагындырган. Күш-ажылчы коллективтер удуртукчулары ол айтырыгны боттарының хыналдазынга тудар.