Пианист-виртуоз Сергей Тарасов Тываның найысылалынга Валерий Халиловка сактыышкын концертти көргүзер

Бөгүн, январь 30-де, 2016 чылдың декабрь 25-те айыыл-халапка таварышкаш мөчээн ооң эжи Валерий Михайлович Халиловтуң адын эдилээн Тываның күрүне филармониязынга ат-сураглыг пианист Сергей Тарасов концертин көргүзер. А.В. Александров аттыг Россия Армиязының ыры болгаш плясканың академиктиг ансамблиниң легендарлыг удуртукчузунга тураскаал концерттер 2017 чылдан тура, ооң төрүттүнген хүнүнде, чыл санында эртип турар.
Сергей Тарасов биле Валерий Халилов эш-хуузунда эдержип, кады хөгжүм төлевилелдерин боттандырып турган. Виктор Тока аттыг Тываның күрүне филармониязының симфониктиг оркестри-биле кады пианист-виртуоз, пианинога эң шыырак делегей мөөрейлериниң шупту шаңналдарының эдилекчизи-рекордчу Сергей Тарасов эжинге хүндүткел болгаш мөгейигниң концертин ойнаар.
Токиога Сантори-холл (Suntory Hall), Осакага Фестивалл-Холл (Osaka Festival Hall) эң шыырак делегей конкурстарының жюризин, Джузеппе Верди аттыг Милан консерваториязының, Сиднейде Сидней операзының, Зальцбургбда Моцартеумнуң, Парижте Гавонуң публиказын, Севильяда Маэстранца театр залын кайгаткан маэстронуң киржилгези-биле кайгамчык концертти республиканың чурттакчылары бо кежээ көөр.
Дирижёр, композитор Валерий Халилов Тыва Республиканың улуг өңнүү чораан, ол 2012 чылда «Азия төвүнде фанфарлар» деп бирги фестивальга хүндүлүг аалчы болуп бир дугаар келген. Оон 2014, 2015 чылдарда Төп шериг оркестри-биле келгеш, республиканың чурттакчыларынга уттундурбас оюн-көргүзүглерни бараалгаткан. 2016 чылда Халилов Тывага сөөлгү катап келгеш, А. Александров аттыг Кызыл туктуг ансамбльдиң составы-биле Кызылдың 1 дугаар школазының юбилейинге концертти көргүскен.
Республиканың улуг өңнүү – тоолчургу дирижер болгаш композиторга тураскааткан хемчеглер чылдың-на Тывада болуп турар. В. М. Халилов аттыг Тываның күрүне филармониязы 2017 база 2018 чылдарда делегей чергелиг дирижерлер конкурузун эрттирген, а 2021 чылда конкурсту В.М. Халиловтуң фондузунче дамчыдыптарга, ол конкурс Москвада Гнесиннер аттыг Россияның хөгжүм академиязының баазазынга эрткен. 2022 чылда Валерий Халиловтуң 70 харлаанынга тураскааткан хөгжүм фестивалы болуп эрткен. Аңаа Тываның Чазааның Үрер хөгжүм оркестри Кызыл шөлге база Россияның Чепсектиг күштериниң хүрээзиниң чанынга дошка шоуну организастаан.