Республикада «Тывага бүдүрген» деп ылгавыр демдек-биле барааннар садып-саарылгазының дыштаныр хүн ярмаркалары ажылдап эгелээр

Тыва Республиканың Экономиктиг хөгжүлде яамызы-биле кады Сайгарлыкчы чорук фондузу, «Россияның чөленгиижи»/«Опора России» тыва регион салбыры, Аныяктар херектериниң талазы-биле агентилел тус черниң бараан бүдүрүкчүлерин шулуудадырының чаа хевири – «Тывага бүдүрген»/«Сделано в Туве» деп ылгавыр демдектиг продуктулар садып-саарар дыштаныр хүн ярмарказын организастаар. Ай санының сөөлгү субботазында ярмаркалар болур, Кызыл хоорайда Аныяктар ордузунга февраль 4-те ол стартты алыр.
«Тывага бүдүрген»/«Сделано в Туве» деп дыштаныр хүн ярмарказында садып алыкчылар мастерлериниң боттарындан сонуургаан чүүлдерин садып алырынга, тус чер бараан бүдүрүкчүлерин деткииринге сорунзалыг чер болу бээрин, ук хемчегниң чарлалында бижээн.
Шагаа байырлалының бүдүү айында бирги ярмарканы организастаар. Найысылалдың уран шеверлериниң даарааны национал хептерни, дизайнерлерниң тускай аянныг каас чараш хептерин, национал бөрттерни, каасталгаларын, суй-белектерни, хол-биле кылган катаптаттынмас ажылдарны аңаа делгээр. Шупту барааннар «Тывага бүдүрген»/«Сделано в Туве» деп ылгавыр демдектиг.
Ярмарка үезинде дизайнерлер ажылдарының шоу-көргүзүүн база ус дарган мастерлерниң ажылдарын таныштырып көргүзер.
Февральдың 4 база 5 хүннеринде, Аныяктар ордузунга тус черниң бүдүрүкчүлерин деткээн дыштаныр хүннүң бирги ярмарказы 10.00 шактан 17.00 шакка чедир болурун организаторлар дыңнаткан.