Тывада тускай операция киржикчилерин транспорт үндүрүүнден хостаан

Тывада транспорт үндүрүүнге чиигелде алыр хамаатылар категориязын тодараткан. Тускай шериг операциязында киржип турар республиканың чурттакчылары – долу эвес мобилизация-биле кыйгыртканнар, шериглер база керээ-биле албан эрттирип турар эки турачылар 2022 база 2023 чылда үндүрүг төлээринден хостаанын РФ-тиң Федералдыг үндүрүг албанының ТР талазы-биле эргелели дыңнаткан. 2022 чылдың декабрь 21-де хүлээп алган Тыва Республиканың Хоойлузу езугаар, транспорт үндүрүүн төлээринден хостааны болза:
- Россия Федерациязының Президентизиниң 2022 чылдың сентябрь 21-де 647 дугаарлыг "Россия Федерациязынга долу эвес мобилизацияны чарлаарының дугайында" Чарлыынга даянып, Россия Федерациязының Чепсектиг Күштеринче мобилизация-биле шериг албанынче кыйгырткан хамаатылар;
- тускай шериг операциязының үезинде, эки турачы отряд составы-биле Донецк Улус Республика, Луганск Улус Республика, Запорожье облазы, Херсон облазының девискээринге албан хүлээлге эрттирер дугайында керээ чарып алган хамаатылар;
- тускай шериг операциязынга киржир сорулгалыг Донецк Улус Республика, Луганск Улус Республика, Запорожье облазы, Херсон облазының девискээринге албан хүлээлге эрттирер дугайында керээ чарып алган шериг албанныглар;
- Донецк Улус Республика, Луганск Улусй Республика, Запорожье облазы, Херсон облазының девискээринге тускай шериг операциязында киржип турар шериг албанныглар, Россия Федерациязының национал гвардиязында албан эрттирип турар база полицияның тускай аттары бар кижилер.
Ол ышкаш Совет Эвилелиниң Маадырлары база Россия Федерациязының Маадырлары, Алдар ордениниң бүрүн кавалерлери, Ада-чурт дайынының хоочуннары болгаш киржикчилери, Чернобыль АЭС-ке радиация алган хамаатылар база I-ги база II-ги бөлүктүң инвалидтери, дайынчы хөделиишкиннер хоочуннары, ядерлиг база термоядерлиг чепсектер шенелдезинде онза айыылда кезектер составынга дорт киржип турган, шериг объектилеринге база чепсеглээшкин чепсек-херекселдеринге ядерлиг тургузугга озал-ондакты чайладырынга киржип турган кижилер "Транспорт үндүрүүнүң дугайында" ТР-ниң Хоойлузу езугаар транспорт үндүрүүнүң төлевиринде чиигелдени алыр эргелиг.
Шимчедикчизиниң күчүзү чүгле 150 чедир аът күштүг транспорт аймаанга ол чиигелде хамааржырын сагындыраал.
Транспорт үндүрүүнге үндүрүг чиигелдезин бээр дугайында билдириишкинни үндүрүг төлекчизиниң Хууда кабинеди, МФЦ таварыштыр, почталап азы боду баргаш киирип болур.