Тываның Баштыңы полицияның бүрүн эргелиг участок төлээлериниң республика съездизин эрттирерин саналдаан
27.01.2023
Республиканың Иштики херектер яамызының түңнел коллегия хуралында, Тываның Баштыңы сөстү алгаш, ындыг саналды киирген. Владислав Ховалыгның бодалы-биле алырга, Тывада чарлаттынган Чоннуң чаңгыс эп-сеткилиниң чылында, съезд республикада корум-чурум үрекчилери-биле демиселде, хөй-ниити айыыл чок чоруун хандырар чаа болгаш дээштиг шиитпирлерни хүлээрде шупту күштерни мөөңнээринге таарымчалыг шөлчүгеш апаар ужурлуг.
Тываның Дээди Хуралының (парламент) даргазы Кан-оол Даваа, ТР-ниң Дээди судунуң даргазы Валерий Ондар, Тывада федералдыг инспектор Шолбан Монгуш, Тываның прокурору Сергей Дябкин, Федералдыг айыыл чок албанның ТР-де эргелелиниң начальниги Владлен Мельников, РФ-тиң Истелге комитединиң ТР-де Истелге эргелелиниң удуртукчузу Константин Столбин, Федаралдыг суд приставтар албанының ТР-де начальниги Омак Достай болгаш өскелер-даа коллегияның ажылынга киришкен.
Иштики херектер сайыды, полицияның полковниги Сергей Кондрашов кол илеткелди номчаан. РФ-тиң Президентизиниң чарлыы-биле 2022 чылдың ноябрьдан ук ведомствону удуртуп турар. Республика девискээринде оперативтиг байдалдың эрткен чылда түңнелдеринден көөрге, бүрүткеттинген кем-херектерниң ниити саны 22 хуу кызырылган (8483-тен 6619). Ажыттынган кем-херектерниң ниити саны 11,5 хуу көвүдээн (48,2 хуудан 59,7 хуу). Регион Россияда ол талазы-биле лидерлер санынче кирзе-даа, чуртта ортумак сан-чурагайларга деңнээрге, бедик болуп артпышаан.
Эрткен чылын корум-чурум камгалаар адырның шупту удуртукчулары-биле кады, 2022 чылда Тыва Республикада кем-херек үүлгедиишкиннерин кызырар талазы-биле ведомстволар аразының комплекстиг планын бадылап алган ажылдап турар. Хөй-ниити айыыл чок чоруунуң адырында хемчеглерниң дээштиин хандырарынга республиканың чазаа регионнуң үш күрүне программаларындан акша-хөреңгини мөөңнээн.
«2021-2024 чылдарда Тыва Республикада хөй-ниити чурумун хандырары база кем-херек үүлгедиишкининге удур демисежири» деп кол программаның боттанылгазы-биле 2022 чылда Бай-Тайга кожууннуң Шуй суурда база Кызыл хоорайның Вавилин ээтпээнде полицияның бүрүн эргелиг участок төлээзинге чурттаар бажыңны полицияның хөй-ниити пунктузу-биле тудуштур туткан. Бо чылын онза хереглелдиг черлерге үш ындыг объектини тударын планнаан.
2022 чылда 139,5 тонна арага продукциязын чажыт саарылгадан хавырган, эки турачы улусчу дружина кежигүннери-биле республиканың тус чер бот-башкарылга черлери ооң 51,6 тонназын илередип, туткан. Регионда кем-херек үүлгедиишкиннерин кызырар план күүселдези-биле спирт холумактыг продукцияның чажыт садып-саарылгазынга хамаарышкан айтырыгларны көрген аңгы хуралды эрттирер.
Ооң мурнунда шииттирип чораан кижилерниң талазындан база катап кем-херек үүлгедиишкиннери демдеглеттинген. Ниитилел хөгжүлдезин чайгылдырган бир чылдагаан ол бооп артпышаан, аңаа удур профилактика ажылдарын организастаарынга негелдени шыңгыырадыр херек. Ооң мурнунда шииттирип чораан кижилерниң социализациязынче хөй күш болгаш акша-хөреңги херек, ындыг болзажок, ИХЯ хоочуннарының тургусканы коммерцияга хамаарышпас хөй-ниити организациялары таварыштыр ийикпе, шупту ниити шиитпирлээри чугула.
Коллегия хуралында ведомствонуң болгаш Тыва Республиканың Баштыңының шаңналдарын тывыскан. Албан хүлээлгелерин ак сеткилдиг күүседип, ажыл-чорудулгазында бедик көргүзүглери дээш, Тываның Баштыңының Өөрүп четтириишкини-биле ОШААЧКИ эргелелиниң орук-патруль албаны база административтиг хоойлу күүседир килдизиниң начальниги – салбыр начальнигиниң оралакчызы, полицияның подполковниги Екатерина Валева, Кызыл хоорайда Россияның ИХЯЭ полицияның участок бүрүн эргелиг төлэлериниң база назы четпээннер херектериниң талазы-биле кезээниң ажыл-чорудулгазын организастаар килдизиниң полицияның участок бүрүн эргелиг төлээлер килдизиниң назы четпээннер херектериниң талазы-биле килдистиң улуг инспектору, полицияның майору Шолбана Александрова, Кызыл хоорайда Россияның ИХЯЭ полицияның патруль-пост албанының аңгы ротазының мобильдиг взводунуң инспектору, полицияның биче лейтенантызы Радомир Салчак, Тыва Республикада Иштики херектер яамызының Орук шимчээшкининиң айыыл чок чоруунуң күрүне инспекциязының орук-патруль албанының аңгы ротазының 2-ги взводунуң улуг инспектору (орук-патруль албанның), полицияның улуг лейтенант Шораан Ооржак оларны шаңнаан.
Кызыл хоорайда ИХЯ эргелелиниң полицияның патруль-пост албанының аңгы ротазының 2-ги взвод командириниң оралакчызы, полицияның майору Сергей Окан-оолович Намчылакка хөй чылдарда төлептиг албан ажылы дээш Тыва Республиканың Баштыңының Хүндүлел бижиин тывыскан.
Возврат к списку
|