Тываның тергиин студентилеринге республика Баштыңының стипендияларын тывыскан

Тываның национал хөгжүм-шии теарынга, Российжи студентилер хүнүнге тураскааткан Ректор балында, Владислав Ховалыгныы-биле алырга, эң харыысалгалыг болгаш карак кызыл оолдар, кыстарның – Тыва Республиканың Баштыңының стипендиязын алыр студентилерниң аттарын чарлаан. Вице-премьер Елена Хардикова стипендиаттарга дипломнарны тывыскан.
Инженер-техниктиг факультеттиң студентилери Чейнеш Донгак биле Софья Долгар, бойдус-география факультединиң студентизи Карина Доржу, юридиктиг факультеттиң студентизи Луиза Матазова, төөгү факультединиң студентилери Аялга Монгуш биле Саглай Ондар, филология факультединиң студентизи Оргаадай Сат, Кызылдың педагогика институдунуң студентизи Аюна Седен, экономика факультединиң студентизи Чойган Ховалыг, Тываның тудуг техникумунуң сургуулу Чаян Иргит, А.Б. Чыргал-оол аттыг Кызылдың уран чүүл колледжизиниң сургуулу Дара Куулар ТР-ниң Баштыңының стипендияларынга төлептиг болганнар.
#МЫВМЕСТЕ республика штавының ажылынга идепкейлиг киришкен Тываның күрүне университединиң студентилерин Баштыңның Өөрүп четтириишкиннери-биле демдеглээн.
Байырлалда республика Баштыңының, Кызыл хоорай мэриниң база ТывКУ ректорунуң стипендиялары дээш конкурстарның тиилекчилерин таныштырган.
Бо чылдың Ректор балы ачы-буян чыылдалыг болганы-биле онзаланган: #МЫВМЕСТЕ акциязы-биле эрткен байырлал киржикчилери 80 муң ажыг рубльди чыгган. Ол акша-хөреңгини тускай шериг операциязында бистиң оолдарны деткиир кылдыр Тываның ОНФ-ке дамчыдып берген. Тускай операцияның маадырлары байырлал-биле студентилерге болгаш башкыларга байырын боттары чедирип, сургуул аныяктар-биле вальсты самнап, байырлалдың хей-аъдын тургускан.
Бүгү-российжи база делегей конкурстарынга, спортчу маргылдааларга өөренип турар черлериниң аттарын чедиишкинниг камгалап, тудуг отрядтарынга ажылдап, шуулганнарда база конференцияларда социал болгаш эртем төлевилелдерин таныштырган тергиин студентилер Ректор балынга киришкен. Ол ышкаш республиканың ортумак тускай өөредилге черлериниң сургуулдарын база найысылал школачыларын байырлалче чалаан.