Тывада албан медицина камгаладылгазының девискээр фондузунда чаа удуртукчуну томуйлаан

Республиканың 2 дугаар эмнелгезиниң кол эмчизи турган Кужугет Шолбан Артемовичини албан медицина камгаладылгазының девискээр фондузунуң директорунда томуйлаан. Тыва Республиканың Чазааның даргазының регионда кадык камгалал адырын хайгаарап турар оралакчызы Елена Хардикова чаа томуйлаткан удуртукчу-биле ужурашкаш, фонд-биле кады ажылдаарының чугула айтырыгларын чугаалашкан.
Чадаана хоорай чурттуг Шолбан Кужугет Кемеровонуң күрүнениң медицина академиязынга эмчи мергежилди чедип алган. Республиканың 1 дугаар эмнелгезиниң хүлээп алыышкын салбырынга кезер эмчи кылдыр күш-ажылчы оруун 2013 чылда эгелээн. Ол-ла салбырның эргелекчизи чедир депшип, 2015 чылдан 2019 чылга чедир ону удурткан. 2019 чылда республиканың 1 дугаар эмнелгезиниң кол эмчизиниң организас-методиктиг ажыл талазы-биле оралакчызынга томуйлаткан. 2021 чылдың сентябрьдан бо хүнге чедир - республиканың 2 дугаар эмнелгезиниң кол эмчизи.
Тывада албан медицина камгаладылгазының девискээр фондузу - албан медицина камгаладылга адырында күрүне политиказын боттандырган, албан эмчи камгаладылгазының девискээр программазында камгаладыкчының ажыл-чорудулгазын күүседир коммерцияга хамаарышпас организация болур.
Фонд албан медицина камгаладылга системазында хамаатыларның эргелерин хандырып, эмчи дузазының чедингирин болгаш ооң шынарынга таарымчалыг байдалдарны тургузар кол ажылдыг.