Тывада орук кыдыынче кире берген автобустарга чораан уруглар когараваан

Бөгүн, январь 25-те, күрүнениң автоинспекция машиналарынга үдедип алгаш, республика найысылалындан “Шира” сантаторийже уруглар сөөртүп бар чыткан ийи автобус орук кыдыынче кире берген. Дүрген эмчи дузазының бригадазы шупту уругларны шинчээн соонда, берттип-кемдээн кижи чок болганын, республиканың Кадык камгалал яамызы дыңнаткан.
Уругларның шуптузун хынаан соонда, когараан кижи чок болганда, техниктиг хыналданы эрткен өске автобустарга уруглар оруун уламчылап чоруурун харыысалгалыг ведомстволарның шупту төлээлери шиитпирлээн.
Хоойлужудулга езугаар, керээ-биле уруглар сөөртүлгезин организастаанын, Кадык камгалал яамызы дыңнаткан. 128 уругну 6 үдекчи үдеп чоруур кылдыр үш автобусту хөлезилээн. Чурум ёзугаар, пассажирлер сөөртүр транспортта-ла ийи чолаачы чораан.
Кадык камгалал сайыды Анатолий Югай, сайыттың ие-чаш болгаш уруглар талазы-биле оралакчызы Нелля Ховалыг, орук-транспорт комплекизиниң сайыды Шораан Чыргал-оол болган болуушкуннуң чылдагаанын илередип, дүрген хемчеглерни алыры-биле, ол черге четкен.