Тываның Баштыңы спортчуларның болгаш тренерлерниң сургакчылаашкын чарыгдалының хемчээлин эде көөр даалганы республиканың Саң-хөө яамызынга берген

Тываның эрге-чагыргазы спортчулар болгаш оларның тренерлериниң маргылдааларга киришкен чарыгдалдарын улгаттырар чадавас. Тыва Республиканың Баштыңы Владислав Ховалыг маргылдаа болур черже баар-кээриниң, чурттаарының болгаш чемненириниң чарыгдалдарын акшаландырарының чаа нормативтерин ажылдап кылыр даалганы ТР-ниң саң-хөө сайыдынга берген. Бөгүн Тываның Спорт яамызының удуртулгазы-биле болган ужуражылга үезинде ооң дугайында айыткан.
«Чемненириниң, чурттаарының, аай-дедир чоруурунуң амгы санаашкыннарын 2011 чылда бадылаан турган. А спортту сайзырадыры, анаа-ла сөстер эвес-тир. Спортчулар саны көвүдээн, ынчап кээрге, ооң хандырылгазын чогуур деңнелге чорудары эргежок чугула. Саң-хөө яамызы-биле кады дөстерни тывар апаар бис» - деп, Владислав Ховалыг хуралдың түңнелдерин соцчеткилерде бодунуң арынында бижээн.
2022 чылда 1450 спортчу Тываны аңгы-аңгы деңнелдиг маргылдааларга төлээлеп, 494 медальдарны, ооң санында 145 алдын медальды чаалап алганын, республиканың Спорт яамызы дыңнаткан. Спорттуң аңгы-аңгы хевирлеринде национал чыынды командалар составында республиканың 111 спортчузу бар.
Тываның Баштыңы “чоннуң тудуу-биле” туткан “Эзирлер уязы” губернатор төлевилелиниң спортчу залдар тудар ажыл-херекти ам-даа уламчылаарын спорт ведомствозунуң удуртукчуларынга чугаалаан.
Бо чылын Бай-Тал, Аяңгаты, Теве-Хая, Сарыг-Сеп, Сукпак, Суш, Сосновка, Самагалтай, Шуурмак, Бай-Даг база Каа-Хем суурларга “Эзирлер уязы” туттунар. Оон аңгыда,бо чылын ангар хевирлиг модульдуг залдарны тудары, ийи спортчу шөлдерни чаагайжыдары, спортчу 13 объектини бүрүнү-биле септээри, Шагаан-Арыг хоорайда спорт комплекизиниң тудуун доозары көрдүнген.
Тывага чайгы бирги спартакиаданы эрттирерин белеткээри база РФ-тиң камгалал сайыдының кубогу дээш спортчу хүрешке делегейниң бүгү армейжи маргылдаазын Кызылга эрттирери – чылдың мурнады көөр хемчеглери болур.