Тывада хууда уруглар садтары күрүне деткимчезинче кордап болур

Тывада школа назыны четпээн өөредилгениң хуу организациялары күрүнеден дузаламчы-биле 1,5 хардан 3 харга чедир уругларга немелде олуттарны ажыдып ап болур. «Демография» национал төлевилел чорудуу-биле конкурс шилилдезинге даянып, 2023 чылда федералдыг бюджеттен субсидияны бээр. Тывада «Өөредилге хөгжүлдези» күрүне программазы хуу уруглар садтарынга 50 олутту немей ажыдарынга 6 млн. ажыг рубльди тускайлаан.
Школа назыны четпээн уругларга өөредилге программалары-биле ажылдап турар күрүнениң эвес өөредилге организациялары азы хуу сайгарлыкчылар конкурс шилилдезинге киржирин республиканың Өөредилге яамызы дыңнаткан. Назы четпээн өөредилге программазы-биле өөредир лизенцияның оларда бары – акшаландырыышкынче кордакчыларга кол негелделериниң бирээзи.
Конкурска канчаар киржирин, херек документилер даңзызын, чагыг тургузарының негелделерин, конкурсче киирген чагыгны көөрүнүң чурумун база дүрүмүн https://monrt.rtyva.ru/images/Prikaz39.pdf шөлүгден таныжып болур.
Февраль 14-ке чедир, понедельник - пятница хүннеринде 08.30 шактан 17.30 шакка чедир, бо адресте билдириишкиннерни хүлээп турар: Кызыл хоорай, Ленин кудумчузу, 39 (каб. 301). Харылзажыр телефону - 8 (39422) 6-15-90.