Тывада шериг албанныгларга эмчи болгаш психологтуг дузаны көргүзүп турар
20.01.2023
Республика Баштыңы Владислав Ховалыгның даалгазын күүседип, Тывадан тускай шериг операциязының киржикчилеринге болгаш оларның өг-бүле кежигүннеринге эмчи дузазын көргүзериниң “ажык коридорун” ажылдаткан. Дайынчы хөделиишкиннер девискээринден чанып келген азы шөлээде шериглерни участок эмчилери база тускай мергежилдиг специалистер оочур чокка хүлээп алыр. Шинчилгелерниң түңнелдери-биле «Серебрянка» санаторийге реабилитация эмнээшкининиң курузун эртип болур.
Шериг албанныгларны база оларның өг-бүлелерин деткиир республиканың каттышкан штавы тускай шериг операциязының киржикчилеринге эмчи үделгезиниң айтырыгларын контрольда алган. Республиканың Кадык камгалал яамызының шугуму-биле көргүскен деткимчениң ол хевиринге отчетту штаб хуралдарында дыңнап турар.
ТШО 64 киржикчизи республиканың 1 дугаар эмнелгезинге эмчи дузазы дээш келгенин сөөлгү хуралда дыңнаткан. Поликлиникаларга 41 кижи эмчи шинчилгезин эрткен. Арткан дайынчылар стационарга чыдып эмнеткен.
Тускай операцияның 51 киржикчизи база оларның өг-бүлелериниң 13 кежигүнү «Серебрянка» профилакторийге реабилитация эмнээшкинин алган. 6 дайынчы эмнээшкин курузун январьның 10-дан эгелээн.
Губернатор штабтың мурнунга тускай шериг операциязының киржикчилеринге психологтуг дузаны көргүзүп, сагыш-сеткил кадыкшылын быжыглаар даалганы салган турган.
Тываның Кадык камгалал яамызы республиканың психатрия эмнелгезиниң баазазында хереглээн кижилерге психотерапевтиниң дузазын көргүзүп турар. Бөгүнге чедир 24 кижи психотерапевт дузазын алган, бир өг-бүле психотерапия курузун эрткен.
Тываның психологтар ассоциациязының специалистери база психологтуг дузаны көргүзүп турар. 270 кижи дуза дилеп кирген, 38 кижи психологтуг үделгеде.
Республиканың каттышкан штавының даалгазы-биле, Тываның Күш-ажыл болгаш социал политика яамызы кадыкшыл байдалының аайы-биле шериг албанын дооскан тускай шериг операциязының киржикчилериниң реестрин тургузуп турар. Ол эр кижилер амгы үеде ведомствонуң ажылдап кылып турары ТШО шериг албанныгларынга социал адаптация программазынга киржип болур.
Возврат к списку
|