Тываның Баштыңы Кызыл епархиязының башкарыкчызы архиепископ Феофан-биле ужурашкан

Тываның Баштыңы Владислав Ховалыг православ шажын чүдүлге байырлалдарының эң чырыткылыының бирээзи – Крещение хүнүнде Кызыл епархиязының башкарыкчызы архиепископ Феофан-биле ужурашкан. Орус Православ хүрээниң Кызыл епархиязы база регионда шажынчы эвес эрге-чагыргазының амгы удуртукчузунуң мооң мурнунда төлээзи-биле чарган кады ажылдажылга керээзинге даянып, ужуражылга болуп эрткен.
Владислав Ховалыг республиканың чүдүкчүлеринге чырыткылыг байырлалы-биле база январь 19-та төрүттүнген хүнүн демдеглеп турар архиепископ Феофанга байырын чедирип, епархия төлээлериниң республика девискээринде хөй чылдарда чорудуп турар улуг чырыдыышкын, шажын болгаш ачы-буян ажыл-чорудулгазы дээш, четтиргенин илереткен. Тываның Баштыңы мөргүлдерни база ыдык номналдарны тыва дылче очулдурар ажылдың онза ужур-утказын демдеглээн. Республиканың православ хүрээлеринде үндезин чоннуң чүдүкчүлери бары, мөргүлдерни тыва дылда номчууру – улуг болуушкун.
Владыка Феофан Тывада православ байырлалдарның ёзу-чаңчылдарынга чүгле чүдүкчүлер эвес, а шажындан ырак кижилер сонуургал-биле келирин бо-ла көөр апарганын чугаалаан. Бо хонуктарда ыдыктаан суг дээш дыка хөй кижилер хүрээге келир, шагдан бээр аржаан сугларын хүндүлеп чоруур черге ындыг-даа болур ужурлуг деп, Феофан чугаалаан.
Чазактың база тус черниң меценаттарының деткиишкини-биле, регионда шажын чүдүлге турум хөгжүп турарын Феофан демдеглээн. Өске регионнардан шажын башкылары кээп, албан ёзулалдарын эрттирип, муниципалдыг база республика эрге-чагыргазы-биле кады улуг шажын байырлалдарының хемчеглерин организастажып эрттирип турар. Бөгүнде республикада үш чаа православ хүрээлерин - Шагаан-Арыгда, Бай-Хаакта база Тоора-Хемде тудуп турар.
Кызылдың епархиязы регионнуң хөй-ниити ажылынга идепкейлиг киржип, Тывада православ шажын база ачы-буян ажыл-чорудулгазын доктаамал чорудуп турар.
Кызылдың Воскресенск Кафедралдыг соборунуң девискээринде хереглээн кижилер идик-хепти шилип алыр Чурттакчы чонга гуманитарлыг ачы-дуза төвү ажылдап турар.
Тус черниң чүдүкчүлери Украинадан дескен кижилерге дуза чыырынга идепкейлиг киришкен: үр үеде шыгжап болур үрелбес аъш-чем аймаан, амыдыралга ажыглаар химия дээш, 100 кил хире гуманитарлыг чүъктү чыггаш, Донбассче дамчыдар кылдыр Кызыл хоорай чагыргазынга хүлээткен.
- Эрткен чылын бүгү Орустуң православ хүрээзи 500 хире млн рубльди чыып, гуманитарлыг дуза кылдыр чоруткан. Шак ындыг хүрээ чыылдазын бис база чарлааш, ниити фондуже бодувус үлүүвүс шилчиттивис – деп, владыка чугаалаан. – Тускай шериг операциязының зоназында бистиң епархияның чамдык ажылдакчылары, оларның ажы-төлү бар. Ында ажы-төлү, адалары, өөнүң ээлери дээш хүрээге тейлеп кээп турар кижилер саны көвүдээн. Оларга сагыш-сеткил оожургалын чедирерин кызыдып, дайынчыларывыс онча-менди ээп чанып келзин дээш, тейлеп турар бис.