Тываның коммунал четкилерни эде чаартыр талазы-биле программазын РФ-тиң Чазаа деткээн

Россияның регион хөгжүлдезиниң федералдыг комиссиязы Тыва Республиканың коммунал инфраструктуразын эде чаартырының талазы-биле программаның хемчеглерин сайгарып көрген. Россия Чазааның даргазының оралакчызы Марат Хуснуллинниң даргалаашкыны-биле январь 18-те эрткен штаб президимунуң хуралында, төлевилелдиң түңнелин дыңнаткан. Тываның Баштыңы хуралга киржип тура, кижилерниң амыдырал байдалының шынарын экижидер арганы регион эрге-чагыргаларынга бергенин демдеглээш, РФ-тиң министрлер кабинединге четтиргенин илереткен.
«Тыва Республиканың коммунал инфраструктуразының эде чаартылгазы» программаның кол сорулгазы – элеп-эргижирээн коммунал инфраструктуралар үлүүн эвээжедири. Документиде амыдырал-хандырылганың алды объектилерин чаартыр хемчеглер кирген. Кызыл хоорайда чылыг хандырылгазының үш объектизин база суг хандырылгазының бир объектизин, Шагаан-Арыг хоорайда суг хандырар база суг аңгы төгер бир объектини бүрүнү-биле чаартып, эде кылыр. Ниитизи-биле 32 км инженер четкилерин солууру планнаттынган.
Айыттынган хоорайларда инженер коммуникациялары аргажок эргижирээн деп, специалистер түңнээн. Республиканың найысылалында суг дамчыдар четкилерниң 80 хуу эргижирээн. А Шагаан-Арыг хоорайда коммунал хоорзаларының байдалы база-ла эки эвес. Шилилдениң бир барымдаазы - коммуникацияны ажыглап турар чурттакчы чоннуң санында. Республиканың чурттакчы чонунуң үш кезии Кызылда чурттап турар, а Улуг-Хем кожууннуң административтиг төвү Тываның улуг хоорай округунуң бирээзи кылдыр санадыр.
Регионда ажылдап турар өске-даа федералдыг төлевилелдер-биле кады программа боттандырылгазын чорудар. Чижээ, Кызыл хоорайда чылыг трассазын чаарткан соонда, аңаа черде бажыңнарны кожар арга тургустунар. Эрткен чылын Тываның найысылалының киржип эгелээни “Экология” национал төлевилелдиң “Арыг агаар” федералдыг төлевилелиниң хоорай агаарының хирлениишкининиң деңнелин кызырар дээн сорулгазы боттаныр.
«Айыттынган объектилерниң реконструкциязын 2024 чылдың октябрьда доозары планнаттынган» - деп, Владислав Ховалыг айыткан.
Программа хемчеглерин ниитизи-биле 616 млн рубльга акшаладырар.